KNAPK-p raajarniat ilaasortaajunnaarneranni 600.000 koruunit annaassagai
Ingerlatseqatigiiffiit sinerissap qanittuani raajarnianermik aallutallit qulingiluat KNAPK-mut maannamut ilaasortaajunnaarput. Taamaalilluni raajarniaq kattuffimmut ilaasortaq maanna ataaseq amiakkuulerpoq.
KNAPK-mi siulittaasup oqarnera naapertorlugu ilaasortaajunnaartut kattuffimmut ukiumut akiliutigisartagaat 600.000 koruunit missaanniittut annaaneqassapput.
- Taakkuninnga akiliutigineqartartut aallaavigalugit 600.000 missarpiaani annaavagut, Nikkulaat Jeremiassen KNR-mut oqarpoq.
Ingerlatseqatigiiffiit ilaasortaajunnaartut KNAPK-mut ukiumut qanoq akiliisartigissanerlutik ataasiakkaarlutik isumaqatigiissuteqartartut, taanna aamma oqarpoq. Taakkua akiliutigisartagaat ukiumut 50.000 koruunit 60.000 koruunillu akornanniittut, siulittaasoq oqarpoq.
KNAPK 2020-mi 7.8 millionit koruuninik isertitaqarpoq. Taakkunannga 8 procentit missaanniittut raajarnianit akiliutaasut annaasussanngorpaat.
Sullissineq ajorseriassanngitsoq
Aalisartut piniartullu kattuffiat aningaasaatikillisussaagaluartoq, siulittaasoq sullissinermik allanngornissaanik naatsorsuuteqanngilaq. Ilaasortat sullinneqarnerat taamaaginnassasoq, aningaasaatikillisussanngornerlu kattuffimmi atorfillit ikilinerannik kinguneqassanngitsoq siulittaasup naatsorsuutigaa.
- Ilaasortagut eqqarsaatigalugit sullissineq taamattuartussaavoq. Aamma kattuffik nukittoorujussuugami. Ulluinnarni aqutsisut siulersuisuunerillu taamatut ingerlaannarnissaa naatsorsuutigaarput, Nikkulaat Jeremiassen oqarpoq.
AAMMA ATUARUK KNAPK-p siulittaasuata raajarniat isornartorsiutaat ilisarisinnaanngikkai
Tusagassiortup, aviisimut Sermitsiamut aalisarneq pillugu allaaserisaqartartup, raajarniat kattuffiliulersaartut aalisartunik allanik raajarnianngitsunik tikilluaqqusinerat KNAPK-mut suli ilaasortakillinermik kinguneqarsinnaanersoq pissanngatigaa.
- Sinerissap qanittuani raajarniat kattuffiata pilersinniarneqarnissaanut atatillugu aalisariaatsinik allanik ingerlataqartut aamma kattuffimmut nutaamut pilersussamut tikilluaqquneqarput. Tassanilu pissanganarsinnaavoq KNAPK-p ilaasortani suli amerlanerit aamma annaajumaarnerai, tusagassiortoq Arne Mølgaard oqarpoq.
Kattuffik KNAPK 2700-it missaannik ilaasortaqarpoq.