KNAPK-mi pisortanngortup politikkimiiginnarnissani isumaliutigaa
![](/sites/default/files/styles/image_934x467/public/article_images/7v9a3493.jpg?itok=UTmoXaX-)
Aningaasaqarnermut nunanullu allanut tunngasunut naalakkersuisuusimasoq, Vittus Qujaukitsoq, aalisartut piniartullu kattuffianni, KNAPK-mi pisortanngorpoq.
KNAPK-p siulersuisuunerisa Ilulissani sapaatit akunnerisa siulianni ataatsimiinnerminni tamanna aalajangerpaat.
Kattuffik tusagassiuutinut taama nalunaarpoq.
Vittus Qujaukitsullu KNR-imut oqarnera naapertorlugu Nunatta Qitornai Inatsisartuni sinniisuutitaqaqqilerusuppoq.
- Nunatta Qitornai Inatsisartunut sassaqqikkusupput. Uangali siulittaasuuginnassanerlunga isumaliuutigaara, Vittus Qujaukitsoq oqarpoq.
AAMMA ATUARUK Vittus Qujaukitsoq Aalisarneq pillugu Siunnersuisoqatigiinni siulittaasunngorpoq
Taanna aalisarneq pillugu siunnersuisoqatigiinni aamma siulittaasuuvoq. Naalakkersuisut aalisarnermi allannguissagaangamik taakkua tusarniartarpaat.
Vittus Qujaukitsoq KNAPK-mi ukioq manna marsip aallartinnerani siunnersortitut atorfinippoq, kattuffiulli siulittaasuata, aalisarnemut naalakkersuisuusimasup, Nikkulaat Jeremiassenip, ullut 14-it missaat qaangiutiinnartut pisortaanerugallartunngortippaa.
Soraarsitsineq
Kattuffiummi taamani pisortaa, Bjarne Lyberth soraarsitaavoq.
Kattuffik siorna oktobarimi ataatsimeersuarmat, Nikkulaat Jeremiassen siulittaasunngorpoq. Taanna Bjarne Lyberth, qaammatip ataatsip iluani siulittaasooreernermini nangaanartoqartilereersimallugu marsimi soraarsitsinerup kinguninngua oqarpoq.
Nikkulaat Jeremiassen Bjarne Lyberth pisortaanerutillugu nammineq kattuffimmi siulittaasuusinnaanani oqarpoq. Kattuffiullu ataatsimeersuarnermi anguniagassatut siunnissai anguneqarsinnaannginnerarpai.
- Kattuffik allaffissornikkut sanngiitsigisoq inissisimaffigissallugu uanga tassaniissallunga tulluanngilanga. Aamma anguniakkat anguneqarunnanngillat, Nikkulaat Jeremiassen taamani oqarpoq.
Taassumalu kingorna Siumumi Naleqqamilu allattaanerusimasoq, Mikael Petersen, siunnersortaagallartutut aamma atorfinippoq.
Vittus Qujakitsoq partiimi Nunatta Qitornaani siulittaasuuvoq. Partiili Inatsisartunut siorna qinersinermi naammattunik qinerneqarnani sinniisuutitaaruppoq.