Vittus Qujaukitsoq Aalisarneq pillugu Siunnersuisoqatigiinni siulittaasunngorpoq
Aalisarneq pillugu siunnersuisoqatigiit nutaamik siulittaasoqalerput. Taannalu Vittus Qujaukitsumik ateqarpoq, siunnersuisoqatigiinnilu ukiup sinnerani siulittaasuussasoq, Naalakkersuisut nalunaarput.
Taanna KNAPK-mi pisortaagallartutut maanna inissisimavoq. KNAPK-mi pisortatut atorfik, Bjarne Lyberth ukioq manna marsip ulluisa 19-anni soraarsitaammalli suli inuttaqanngilaq.
Kattuffiup siulittaasuata, Nikkluaat Jeremiassenip, allannera naapertorlugu kattuffiup siulersuisui juulip ulluisa 14-anni pisortassamik toqqaassapput. Taamaakkaluartorli KNAPK-p Vittus Qujaukitsoq Aalisarneq pillugu Siunnersuisoqatigiinni aallartitamisut, tassanilu ukiup sinnerani siulittaasussatut toqqarpaa.
- Vittus Qujaukitsup piukkunnassuseqarnera kattuffimmiit apeqquserneqanngilaq, KNAPK-p siulittaasua, Nikkulaat Jeremiassen KNR-imut allappoq.
Aalisarneq pillugu Siunnersuisoqatigiit Naalakkersuisut pilersitaraat, taakkununngalu siunnersuisartuullu tik. Naalakkersuisut allannguissangaagamik taakkua aamma tusarniartarpaat.
Siunnersuisoqatigiinnut siulittaasuffik ilaasortaatitaqartut, tassalu KNAPK aamma Sulisitsisut, paarlakaallutik ukiukkaartumik tigummisarpaat.
Tassalu KNAPK-p siunnersuisoqatigiinni siulittaassuuffik ukiortaamiilli tigummiaraluarpaa, Nikkulaat Jeremiassenip allanera naapertorlugu, assigiinngitsunik peqquteqartumik siulittaasumik inuttaliinissaq kinguartinneqarsimavoq.
- Vittus Qujaukitsoq qanorluunniit kattuffimmi inissisimassagaluarpat toqqarneqarpoq, KNAPK-p siulittaasua allappoq.
Vittus Qujaukitsup, Sulisitsisuneersoq Bent Sørensen siunnersuisoqatigiinni siulittaasutut kingoraarpaa.
Vittus Qujaukitsoq partiip Nunatta Qitornaasa siulittaasoraa. Taanna Inatsisartunut siornatigut ilaasortaavoq aammalu Naalakkersuisunut arlaleriarluni ilaasortaalluni. Nunatta Qitornai Inatsisartunut siorna upernaakkut qinersinermi isertitaqanngitsoorpoq.
