KNAPK kamattoq: Aalisarumajunnaarneq alloriarnerup tullerissavaa
Takornariat nunatsinnukartut coronap ajornartoortitsinerani kisimik ikilinngillat. Aalisartut tunisinerminni aningaasarsiarisartagaat aamma ikilipput. Assersuutigalugu Royal Greenlandip Nuummi tunisassiorfianut saarullinnik niaquikkanik tunisinermi aki siorna decembarimut sanilliullugu 43 procentimik ullumikkut appasinneruvoq.
KNAPK naapertorlugu sumiiffinni tunitsivinni akinik unammillerfiunngitsuni akit allanngunnginnerupput.
AAMMA ATUARUK Takornarialerisunut ikiorsiissutit sivitsorneqalertut
Nuummi Royal Greenlandip tunisassiorfiani saarullik niaqoqanngitsoq siorna decembarimi kilomut 11 koruuneqartoq ullumikkut 6,25 koruuneqarpoq.
Ikiorsiisutit takornarialerinermut tunngasut ukiortaamiit ingerlaannassasut, inuussutissarsiornermut naalakkersuisoq, Jens Frederik Nielsen, KNR-mut ataasinngormat oqarpoq.
KNAPK qatsussisoq
Tamannalu aalisartunit nuannarineqanngeqaaq.
- Uagut ilaasortatta immikkoortortaqarfippassuillu taamatut pissuseqartoqarnera maannakkut qatsutiivillugu qatsuppaat, KNAPK-p siulittaasua, Henrik Sandgreen, KNR-mut oqarpoq.
Naalakkersuisullu KNAPK-p piumasaanut, tassa aalisartunut ikiorsiissutit sivitsorneqarnissaannut akuersinngippata sakkortuumik iliuuseqartoqarnissaa Henrik Sandgreenip ilaasortaminnut kaammattuutiginiarpaa.
- Naaperiarumaneqanngikkutta uanga ataasiinnaavimmik kaammattuutissaqarpunga. Ikiorumaneqanngikkussi aammalu naleqanngitsutut isigineqaannarussi taava periarfissaq ataasiinnaavoq tassalu: Umiarsualivimmi talinngaannarutta taava aningaasarsiorneq tamarmi univippat aatsaat ikiorserniarneqalissaagut. Tassa taannatuaavoq aqqutissaq, Henrik Sandgreen oqarpoq.
Aalisartunut ikiorsiissutit ukiumi nutaami atorunnaartut atuutilerseqqinneqassanersut, aalisarnermut naalakkersuisup, Jens Immanuelsenip, aalajangertussaavaa. Aalisartut kissaataat malissanerlugu itigartissanerluguluunniit suli aalajanginngilaq. Misissuisoqartorli oqaatigaa.
AAMMA ATUARUK Naalakkersuisup KNAPK-p ikiorneqarnissamik kissaateqarnera itigartitsissutigigaa
Sinerissap qanittuani saarullinniat, raajarniat saattuanniallu siorna ikiorserneqartarput.
