Takornarialerisunut ikiorsiissutit sivitsorneqalertut
Takornarialerinermik inuussutissarsiortut ukiortaaq eqqissisimanerusumik aallartissinnaassavaat. Taakkununngami ikiorsiissutit ukiortaami atorunnaartussaagaluit sivitsorneqarlerput.
- Ikiorsiissutit takornarialerinermut tunngasut sivitsussallugit maannakkut pilersaarusiorparput. Takornarialerineq suli eqqornerlunneqaqqavoq, taamaattumik pisariaqarpoq taakku sivitsussallugit, inuussutissarsiornermut naalakkersuisoq, Jens Frederik Nielsen, KNR-imut oqarpoq.
Ukiortaamiit sivitsuineq qanoq sivisutigisumik atuutissanersoq naalakkersuisup akisinnaanngilaa, coronalli ajornartoortitsinerata sunniutai malinnaavigeqqissaarlugit erseqqissaatigaa.
10 millonit koruunit
Sulisunik angerlartitsinermi aningaasarsiassanut matussusiineq, suliffinnut mikisunut akunnattunullu ikiorsiissutit, takornariartitsinermik suliarisanut ikiorsiissutit, akunnittarfinni unnuinernut misigisaqartitsinermillu angalanissamut tapiissutit sivitsorneqassapput.
- Takornarialerinerup ilua piffissami qanittumi aaqqikkunnanngitsoq takusinnaagatsigu maannakkut sivitsuinitsinnut tunngaviuvoq, Jens Frederik Nielsen oqarpoq.
Naalakkersuisut coronap maannamut ajornartoortitsinerani ikiorsiissutinut tamanut 10 millionit koruunit aningaasartuutigigaat inuussutissarsiornermut naalakkersuisup oqaatigaa.
Allanik ikiorsiisoqassanngikkallartoq
Jens Frederik Nielsenip takornarialerisut takornarianik coronap ajornartoortitsinerani tikittoqannginnerani nunaqavissunut takornariagassanik sammisassanillu nutaanik nassaarsiullaqqinnerarlugit nersualaarpai.
Takornarialerisut ukiortaaq eqqissisimanerusumik aallartissinnaagaat ikiorsiissutit allat ukioq naappat sivitsorneqassanersut pillugu apeqqut Jens Frederik Nielsenip maanna akerusunngilaa.
- Uanga maannakkut neriorsuinianngilanga ikiorsiisutinik allanik eqqussisoqassanersoq, isumaqarpunga taanna utaqqimaarneqartariaqartoq, Jens Frederik Nielsen oqarpoq.
Taamaalilluni assersuutigalugu sinerissap qanittuani aalisartunut ikiorsiissutit ukioq naappat atorunnaassapput.