Frederik Marylu kalaallit meerartaannut millionit affaanik tunnissuteqartut
![](/sites/default/files/styles/image_934x467/public/img_0001.jpg?itok=smilR-Ir)
Kunngissap Frederiup Kunngissallu nuliata Maryp nersornaatit assigiinngitsut pingasut Aalborgimi Musikkens Husimi tunniuppaat.
Kunngissakkut nersornaasiisarnerat
Kunngissakkut nersornaasiisarnerat Bikubenfondenimit Kunngissakkut katinnerani tunissutitut 2004-mi pilersinneqarpoq.
Nersornaasiisarnermi danskit, kalaallit savalimmiormiullu kulturiannik isumaginninnermilu suliaannik nersorinninnissaq ersersitsiniarnissarlu siunertaavoq.
Najoqqutarisaq: Kongehuset.dk
"Meeqqat inuusuttullu piukkunnaataat takusarpaat, ilivitsuusutullu inuulernissamut ineriartorneranni ikortartortarlugit, piukkunnaatimik tamakkiisumik piviusunngortinnissaanut periarfissaqarniassammata.
"Nersornaatit isumaginninnermi, kulturikkut, eqqumiitsuliornermillu immikkut ittumik suliniuteqartunut tunniunneqartartoq, Peqatigiiffik Kalaallit Meerartaannullu nersornaat isumaginninnermi nersornaataavoq:
Peqatigiiffiup Kalaallit Meerartaata generalsekræteria, Puk Draiby nersornaaserneqarnissamut nuannersumik aggustimi ilisimatinneqarpoq.
- Aallaqqaammut soorunami tupaallappunga, kisianni qinerneqarnerput aamma tulluusimaarutigisorujussuuara. Sulisorpassuit, nammineq kajumissutsiminnik suliaqartut kalaallit meerartaat inuusuttaallu nersornaaserneqarnissarput pillugu tulluusimaarutigaakka, Puk Draiby KNR-imut oqarpoq.
Aningaasat nunatsinni ilinniarnermut atussasut
Peqatigiiffik Kalaallit Meerartaat 1924-mili piulerpoq, meeqqat sakialluuteqartut pingaarnermik sulissutigalugit.
Peqatigiiffiup nunatsinni suliaqarnini ukiuni kingullerni pitsanngorsarpaa, ilaatigullu Namminersorlutik Oqartussat, MIO ilinniarfiillu assigiinngitsut suleqatigisarlugit. Kalaallillu meerartat inuusuttaallu siusinnerusukkut amerlanerusut tikinneqartalersimasut Puk Draibyp oqaatigaa.
AAMMA ATUARUK Meeqqat tamarmik isumaginninnermi suliani tamani maanna najorteqartalerput
Aningaasat 500.000 koruuniusut qanorpiaq atorneqarnissaat suli aalajangerneqanngilaq - aningaasalli nunatsinni inuusuttut ilinniarnerannut ikiuinermut atorneqassapput.
- Inuusuttunut ilinniarnermullu pingaaruteqassapput. Tamatumami kivitsiviusariaqarnera takusinnaavarput. Tamanna isumaqatigiissutaasorujussuuvoq, Puk Draiby oqarpoq.
AAMMA ATUARUK Meeqqat pillugit Isumaqatigiissut nunatsinni suli eqquutsinneqanngilaq
Kunngissap Frederiup Kunngissallu nuliata Maryp toqqaanerat aamma immikkut pingaaruteqartoq generalsekretærip oqaatigaa.
- Kunngissakkut Danmarkimi nunatsinnilu pingaaruteqartorujussuupput. Taamaalilluni nunarput nersornaaserneqarnikkut pakkunneqartutut aamma misigisinnaavoq. Aamma nunatta Danmarkillu akornanni naalagaaffeqatigiinnermut ataatsimoorussanillu unammilligaqarnitsinnut uppernarsaataavoq.