Kisitsisit qaffasinnerujussui Naalakkersuisup ernumanartoqartippai

Naalagaaffiit Peqatigiit Ikiaroornartut sakkortuut Pinerluttulerinerlu pillugit sullissiviata pinngitsaaliilluni atoqatiginninnerit nalunnaarutigineqarsimasunut kisitsisaataat danskit aviisiata Metroxpressip misissorsimagaat ullumi oqaluttaraarput.

Nunatsinnilu pinngitsaaliinernik nalunaarutiginninnerit nunap innuttaasuisa amerlassusaanut naleqqiullugu nunarsuami amerlanerpaapput.

Taama nalunaartoqarnera inatsisinik atuutsitsinermut naalakkersuisup ajuusaarutigaa.

- Angisoorujussuuvoq. Ajoraluaqaaq, Mala Høy Kúko taama oqarpoq.

Kisitisilli siuariartortoqarsimaneranik aamma takutitsisinnaanerarpai.

- Inuit amerlasuut sassartalersimapput. Tunuarsimaarneq pigiunnaarsimavaat. Tamanna inuit amerlasuut, aamma inuusuttut amerlasuut sassartalersimanerannik takussutissaavoq, Mala Høy Kúko taama oqarpoq.

Aamma atuaruk Nunatsinni pinngitsaaliinerit nunarsuarmi amerlanersaasut

Pinngitsaaliillunili atoqateqarnerit 132-it politiinut nalunaarutigineqarneri, innuttaasut amerlassusaannut naleqqiullugu Nunarput Naalagaaffiit Peqatigiit pinngitsaaliilluni atoqateqarnerit pillugit allattorsimaffianni qulliulluni inissisimalerpoq.

Inuinnarnut sunniuteqarniartunut gruppimut, 8.marts gruppenimut, atuagassaq quarsaarnarpoq.

- Kisitsisit annertuallaaqaat. Amiilaarnarpoq. Taamatut oqartariaqarpugut. Uku nalunaarsorneqarsimasut saniatigut aamma amerlasoorpassuit nalunaarsorneqarsimanngitsut qularinnginnatsigu, 8. marts gruppimi ilaasortaq Inuk Bourup Nielsen oqarpoq.

Naalakkersuisulli pinngitsaaliilluni atoqateqarneq akiorniarlugu paasissutissiinermik pitsaaliuinermillu sulissuteqarput.

- Pisoq aallaavigalugu, uagut Nivi Olsenilu pilersaarusiussaagut. Qanoq isilluta siunissami pitsaanerusumik iliuuseqarsinnaanerluta. Atuarfinni, aamma inersimasut atuarfianni eqqunneqarsinnaanissaa, politiit ikiortigalugit, Mala Høy Kúko taama oqarpoq.

Aamma atuaruk Politiit ukiumoortumik kisitsisitigut paasissutissaataat nikalluallannartut

Pinngitsaaliilluni atoqateqartoqarsimatillugu eqqartuussivimmi suliarineqalernerani misigissutsinut artornarsinnaanera pissutigalugu meeqqanut aamma sapernannginnerulersikkusuppaa.

Meeqqat aqqaneq marluk ataallugit ukiullit ilisimannittutut nassuiaataat videokkut immiullugu eqqartuussivimmi atorneqarsinnaasarpoq, taamaalilluni meeqqat eqqartuussinerup nalaani eqqartuussivimmiittariaqartarnatik.

Mala Høy Kúkop meeqqat 15-it inorlugit ukiullit taama periarfissinneqartarnissaat kissaatigaa.

Pinaveersaartitsinerlu sunniuteqarluassappat pinerliisartut aamma ukkatarineqartariaqartut, 8. marts gruppimit isumaqarput.

- Killissamik qaangiisup aamma ilitsersorneqarnissaa, arlaatigut ilitsersuutinik peqartuuppat, inuup allap killiinik ataqqinninnerunissamut peqartuuppat, immaqa aamma taamaalilluta pinaveersaartitsinerusinnaagaluarpugut, Inuk Bourup Nielsen oqarpoq.