Kirsten Fencker tusatsiakkat eqqunngitsut pillugit: Apeqqusiinissaq pingaaruteqarpoq

Inuit akiuussutissat pillugit eqqunngitsuliorlutillu Facebookikkut siammarteripput. Tusatsiakkat Facebookikkut illoqarfimmiillu nunaqarfimmut sukkasuumik siammarterneqartarput.

Nunatsinni coronamut akiuussutissamik kapitinnermi kingunerisaanik taqqatigut milittoortoqarluni toqusoqarnera pillugu tusatsiakkat eqqunngitsuupput.

Tamanna peqqissutsimut naalakkersuisunngorlaamut, Naleqqamit, Kirsten L. Fenckerimut unammillernarpoq.

- Uggornaqaaq taamatut Facebookikkut allatigullu paasissutissat taamaattut eqqunngittut siammartinneqarsimammata, peqqissutsimut naalakkersuisoq KNR-imut oqarpoq.

Taassuma inuit tusatsiakkanik eqqunngitsunik Facebookikkut atuagaqaraangamik eqqarsarluaqqaartarnissaannik apeqqusiisarnissaannillu kaammattuuteqarfigai.

- Innersuussutigissavara nakorsaanerup nittartagaani taavalu corona nittartagaani paasissutissanik eqqortunik malinnaanissamut. Nalornigaanilu corona-hotlinemut sianerluni nalornissutit apeqqutigineqarsinnaallutik, Kirsten L. Fencker oqarpoq.

Paasissutissat eqqunngitsut pillugit oqaloqatigiissutigisigit

Taassuma sammisamut tassunga atatillugu videolianik qassiiusunik pilersitsinissaq naalakkersuisutut sulilernerani suliassaani siullernut ilaavoq.

- Sapaat akunnera una WHO-p sapaat akunnerititarivaa akiuussutissamik kapitinnissamut malunnaatilimmik, pingaaruteqaqimmat inuiaqatigiinni akiuussutissamik kapitittarnissamut. Tassunga atatillugu naalakkersuisoqarfimmiit videomik sanatitsitinikuuvugut paasissutissat eqqunngitsut siammarterneqartarneri qanoq sunniuteqarsinnaasut innuttaasunut. Sapaat akunnera una saqqummissapput.

AAMMA ATUARUK Ittoqqortoormiini akiuussuserneqarnissamut neqeroorfigineqartut 88 procentii kapitittut

Inuilli tusatsiakkat eqqunngitsut pillugit Facebookikkut siammarterisut inunnit aamma oqaloqatigineqartarsinnaanissaat aamma kaammattuutigaa.

- Pisortatigut paasissutissat saniatigut innuttaasutut eqqissisaaqataanissamut nukissaqaraanni innersuussutigissavara annilaangasunut oqaloqateqartarnissaq. Innersuullugillu corona-hotline aamma attavigineqarsinnaammat nalornissutit tassani akineqarsinnaassammata.

- Uagullu sapinngisarpullu tamaat nittartakkatigut nittartakkatigut, nutaarsiassatigut inoqatinut attaveqaatitigullu paasissutissiiniarpugut, peqqissutsimut naalakkersuisoq, Kirsten L. Fencker oqarpoq.

Akiuussusersuinermi angusat assigiinngitsut

Ittoqqortoormiini inuit coronavirusimut akiuussutissamik sisamanngormat neqeroorfigineqarput. Matumani innuttaasut 88 procentii akiuussutisserneqarnissamik akuersipput. Tamanna nakorsaanerup ilorrisimaartumik angusaqarfiunerarpaa.

Nunatsinni coronavirusimik akiuussusersuinerneq piffissami kingullermi ilungersunarsimagaluarpoq. Nunatsinni coronamut akiuussuserneqarnermi kingorna taqqatigut milittoortoqarnera toqusoqarneralu pillugit tusatsiakkat eqqunngitsut Facebookikkut ingerlaartinneqarnikuupput.

Nakorsaaneq tusatsiakkani taakkunani eqqunngitsoqarnera pissutigalugu pingasunngormat eqqissisaavoq.

Kangerlussuarmi nunatsinnut avataanit isaaffiusumi sapaatip akunneri marluk matuma siorna akiuussutissamik kapuisoqarpoq. Tassani 16-ileereersimasut tamarmik Covid-19-imut akiuussuserneqarnissamik neqeroorfigineqarput.

AAMMA ATUARUK Nakorsaaneq: Tusatsiakkanik eqqunngitsunik siammarteriunnaarlusi

Nakorsaanertulli – tamat akiuussuserneqarnissaat kissaatigigaanni kisitsisit pitsaanngillat. 50-it 60-illu akornanni ukiullit 71 procentiinnaat akiuussutissamik kapitipput.

Inuusunnerusuni tamanna pitsaanerunngilaq. Inuusuttummi 20-t 30-llu akornanni ukiullit affaannaat akiuussuserneqarput.

Akiuussutissaq taqqatigut milittoorutaasutut pasineqartoq AstraZenecameersuuvoq. Nunatsinnilu akiuussutissat Pfizerimeersut Modernameersullu kisimik atorneqarput.