Kinguartitsisoqarsinnaanera Naalakkersuisut ilisimasimavaat
Tele-Postimi pisortaanerugallartup Steen Montgomery-Andersenip oqaatigaa arlaleriarluni Namminersorlutik Oqartussanut nalunaartarsimalluni apriilip aallaqqaataanut piffissaliussap angumerinissaa ajornakusoortoq.
Tele-Postimut isornartorsiuisoq attaveqaqatigiinnermullu naalakkersuisuusimasoq Steen Lynge kukkusimannginnerarpoq.
Tele-Post attaveqaatininngaanniit allaniit internetteqalersinnaagaluaq piviusunngunngitsoortoq marlunngormat saqqummiunneqarpoq. Tassami Tele-Post-imi siunnersortinut aningaasartuutit ingasappallaamik amerliartorsimammata. Naak sullissisussanut aningaasartuutinik 4 millionit koruuninik taamaallaat immikkoortitsisoqarsimagaluartoq 8 millionit koruunit atorneqarsimapput.
Politikkikkut qisuariaatit tupigusuutigai
Internetimik Tele-Postiunngitsumit allaninngaanniilli attaveqalersinnaanissap Tele-Postimit piaaraluni kinguartitsisoqarneqarsimasoq, isornartorsiuisut assigiinngitsut ilaatigut oqaatigaat.
Tele-Postimi pisortaanerugallartup Steen Montgomery-Andersenip kinguartitsisariaqarneq ajuusaarutigaa, politikkikkullu qisuariaatit tupigusuutigalugit.
Aamma atuaruk Akikinnermik internetseqalernissaq piviusunngunngikkallalertoq
Piffissaliussap angumerineqarsinnaanissaa ajornakusuussasoq, Tele-Postip tusarniaanermut atatillugu akissuteqarnermini siorna aasakkut Naalakkersuisunut erseqqissaatigaa.
- Anguniagassatut pilersaarusiami piffissaliussat angumerineqanngitsooratarsinnaanissaat nalunngittuaannarsimavarput. Internetilerisinnaasunut allanut tamanna ilisimatitsissutigaarput. Piffissaliussap angumerineqaratarsinnaannginnera oqaatigiuarsimavarput, Steen Montgomery-Andersen oqarpoq.
Piffissaliussatut pilersaarutit pissutaallutik siunnersortinut aningaasartuutit amerligaluttuinnarsimasut, tamannalu kinguartitsinermut pissutaalluinnartoq taassuma oqaatigaa.
Tele-Postimi siunnersortit internetimut atassusiisussat Telemut qanoq akiliisassanersut naatsorsortussaagaluarpaat.
Aamma atuaruk Politikerit Tele-Post pillugu kamattut
Kinguartitsisinnaaneq isornartorsiuisup ilisimasimavaa
Kinguartitsinerlu attaveqaqatigiinnermut naalakkersuisuusimasup Steen Lyngep Sermitsiamut tamanna pillugu sakkortuumik qisuariarpoq. Tele-Postip inissisimanini matumani atornerlukkaa Steen Lyngep oqaatigaa.
Steen Lyngeli politikkikkut taamani akisussaasuuvoq.
- Ersarissumik uani Tele-Post-ip tusarniaanermini akissuteqaatimi allaqqavoq Tele-Post piffissaliussamut angumersisinnaasimanngitsoq, illit tamatuminnga akisussaaqataasuusimannginnerputit?
- Una pakatsissutigivara suliaq Telep nammineq unitsimmagu sulisullu siunnersortitik soraarsillugit. Oqarsimasuuppata juunip aallaqqaataani kinguartittariaqartoq unammilleqatigiinnermut aallaaveqartumik ingerlatsinissaq aallartinnissaa taava taanna paasisinnaassagaluarpara, Atassut sinnerlugut Inatsisartuni ilaasortaq Steen Lynge oqarpoq.
Taanna aamma oqarpoq Tele-Postip aasaq oqaloqatigineratigut paasitinneqarsimallutik apriilip aallaqqaataanut piffissaliussap angumerineqarsinnaanissaa periarfissaasoq.
Tele-Postip qaqugu piareersimasinnaanissaa sapaatip-akunnerini tulliuttuni nalunaarutigineqarumaartoq, Steen Montgomery-Andersen oqarpoq.
Aamma atuaruk Knud Kristiansenip Tele-Post sunianngilaa
