Kinguaassiutinut inatsisit ilisimarpianngikkaat
” Kalaallit inuusuttut 2004-mi atugaat” pillugit nalunaarusiami saqqummeqqammersumi, nivissat suli 15-iliineqanngitsut 28 procentii kinguaassiutitigut inersimasunit atornerlunneqartarsimanerat atuarneqarsinnaavoq. Pinerluttaalititsinermut Inatsisip paragraf 53-ianni allaqqavoq, kialuunnit meeqqamik 15-it inorlugit ukiulimmik atoqateqarnini imaluunniit kinguaassiuutitigut allatut atornerluinini pillarneqaatigissagaa. Atoqateqarnermut inatsisinik inuusuttut qanoq ilisimasaqartiginersut paasiniaaffigaagut.
Kinguaassiuutit pillugit malerugassaqarnersoq imaluunniit inatsiseqarnersoq nalunngiliuk? Atoqateqassagaanni qassinik ukioqalereersimasariaqarpa? Atornerlunneqarsimagaanni sumut ikiortissarsiornissaq nalunngiliuk? Apeqqutit tamakku inuusuttunut apeqqutigaagut. Inuusuttuaqqat aperisatta amerlanerit inatsiseqarnersoq naluaat imaluunnit ilisimasaqarfigerpianngilaat. Amerlanerilli nalunngilaat ilaqassagutta 15-ileereersimasariaqartugut. Inuusuttuaqqat aperisatta amerlanersaasa atornerlunneqarsimagaanni sumut ikiortissarsiornissaq naluaat. Inuusuttuaqqat aperineqartut inatsisinik ilisimasassanillu allanik atuarfimmi imaluunniit angajoqqaaminni paasitinneqarsimapput. Inuusuttuaqqat ilaat atoqatigiinneq pillugu angajoqqaaminnik oqaloqateqarsimanngillat.
Meeqqat kinguaassiuutitigut atornerlunneqarsimaneq pillugu saaffigisinnaasaat tassaavoq Meeqqanut inuusuttuaqqanullu oqarasuaatikkut oqaloqatiginnittarfik 134.
