MIO Qaanaami: Kinguaassiutitigut atornerluineq paqumigisaallunilu nalunaarutigineqartanngitsoq

Naak meeqqanut kannguttaatsuliortoqarneranik atorfillit pasitsaassisaraluartut oqartussanut nalunaaruteqartoqarneq ajortoq, Meeqqat Illersuisuat nalunaarummi allappoq.

Kinguaassiutinut kannguttaatsuliornerit paqumigineqartorujussuupput, nalunaarutigineqartulli qisuariarfigineqartanngitsut misigisimanartoq, MIO allappoq.

Atorfilik kinaassutsiminik isertuussisoq nalunaarummi allappoq:

- Paqumigineqartorujussuuvoq inuiaqatigiinnguit ima ikitsigimmata imminnut nakkutigisorujussuullutik imaaliallaannarlu qimanneqarsinnaanatik.

Inersimasorpassuit meeraanerminni kinguaassiutitigut atornerlunneqarsimasut aamma kingunerluuteqartitsisorpassuusut, MIO angalanermit nalunaarusiamini allappoq.

Tamanna tunngavigalugu Avannaata Kommuniata Naalagaaffiit Peqatigiit meeqqanut isumaqatigiissutaat artikel 34 kinguaassiutinut kannguttaatsuliornermut tunngasoq unioqqutikkaa meeqqat illersuisuata, Aviaja Egede Lyngep erseqqissaatigaa. Taamaammallu suliniutit assigiinngitsut innersuussutigai.

AAMMA ATUARUK Skolelærer glad for MIO's nye bog om opdragelse

Meeqqat ikiorneqartariaqartut ikiorneqarniassammata kinguaassiutitigut kannguttaatsuliornerit qanoq annertutigineri nalunaarsorneqaqqissaarnissaat meeqqat illersuisuata siunnersuutigaa.

Aammattaaq Qaanaami meeqqanut inersimasunullu kinguaassiutitigut kannguttaatsuliorfigineqarsimasunut katsorsaavimmik pilersitsisoqarnissaa siunnersuutigaa.

AAMMA ATUARUK MIO-p tikeraarnera Qeqqata Kommunianut 49-nik nalunaaruteqartitsisoq