Kinap canadamiut marluk paarnaarussivimmiitinneqareertut kilitsissiatut unnerluutigigai
Kinap canadamiut marluk kilitsissiatut pisortatigoortumik unnerluutigai.
Beijingimi atorfilittaq AFP naapertorlugu taama paasissutissiivoq.
Canadamiut marluk, Michael Kovrig Michael Spavorilu, Kinami qaammatini 18-ini tigummigallarneqareerput.
Canadamiut marluk Kinap attaveqaqatigiinnermut suliffeqarfissuaani Huaweimi aningaasaqarnermut pisortap, Meng Wanzhoup, Canadami oqartussanit tigusarineqaqqammernerani tigusaapput.
AAMMA ATUARUK Canadamioq ataaseq Kinamit tigummineqartoq iperagaavoq
Meng Wanzhou USA-p Iranimut pillaatitut iliuusaanik unioqqutitsisimasutut unnerluutigineqarpoq.
Atorfilittaasimasoq Michael Kovrig, niuertarfiliutilillu Michael Spavor, 2018-imi decembarimi tigummigallarneqalerput.
Huaweimi pisortaq tigusarineqarmat, Canada Kinalu saqitsaatilerput.
Canadami eqqartuussivik Meng Wanzhoup USA-mut tunniunneqarnissaanut suliap nanginneqarsinnaanissaanik akuersereerpoq.
48-nik ukiulik, Meng Wanzhou, Canadami illoqarfiup Vancouverip mittarfiani 2018-imi decembarimi tigusaavoq. Tigusaanissaa USA-mit taamani inassutigineqarpoq.
AAMMA ATUARUK Huawei peqquserluuteqarsimasutut USA-mit unnerluutigineqartoq
Meng Wanzhou Huaweip suleqataa Iranimiittoq Skycom pillugu aningaaserivimmut HSBC-mut sallusimasoq, januaarimi eqqartuussinerni arlalinni oqaatigineqarpoq. Nutaarsiassaqartitsivik AFP taama allappoq.
HSBC taamaalilluni USA-p pillaatitut iliuusaanik unioqqutitsisinnaalersimavoq.
Meng Wanzhou ajortuliorsimannginnerarpoq.