Kinamiut SIK-tut akissaateqartilersaarpaat

Naalakkersuisummi assersuusiormata maani nunatsinni ilinniagaqarsimanngitsoq akissarsigaangat sapaatip akunneranut akileraarutit akilereerlugit 4.500 koruuninik akissarsisarpoq. Nuna allamiorli akileraarutit akilereerlugit 3.100 koruuninik sapaatip akunnermusisassaaq. Taannaannaanngilarli, tassami nuna allamioq nerisaqarnerminut ineqarnerminullu akiliisassaaq, tassalu 2.086 koruuninik akissarsisassalluni.

Nunammi allamiut nalunaaquttap akunneranut 80 koruuninik akissarsisalernissaat Naalakkersuisut maanna qulakkeeraluaraat, taanna ineqarnermut, nerisaqarnermut, sulinngiffeqarnermini angalanermut, qularnaveeqqusiinermut allarpassuarnullu inatsimmi allannguutissaq malillugu nammineq akiliuteqartassaaq. Aamma sulinermi tapit allat, soorlu qaangiuttoornermi tapit taakkununnga atuutsinneqassanngillat. Aamma feeriaqarnersiutit, utoqqalinersiutissanullu tapit nunat allamiunut atuutsinneqassanngillat.

Nunat allamiummi sulisorineqartussat akissarsiami annersaat namminneq nunaminni atortassagaat Naalakkersuisut ilimagaat, naatsorsuutaallu malillugit Kina-miup maani sulisorineqartup akissarsiani nammineq nunamini pisissutigisinnaalluarnerussagai Naalakkersuisut oqaatigaat.

Tunngavilersuutigineqartulli Jess G. Berthelsenip iluarinngilluinnarpai.

- Ajorluinnaqqissaarpoq. Taamatummi inuit taakku akissarsiaat nunagisaminni pisissutigisinnaanerussagaat tunngavilersuutigineqarpoq. Assigiinnarpaami uanga Norgeliarlunga suliartoruma imalu oqarfigineqarlunga: Illit nunanni 80 koruunit 41 ooriinnarsisaravit, taanna naammaginiaruk, uffa Norgemi aningaasarsiat akunnermut 150 koruuniugaluartut, inuit taama pineqartussaanngimmata taamaammat akuersaarsinnaanngilara, SIK siulittaasua Jess G. Berthelsen taama oqarpoq.

Inatsimmullu allannguutissaq allanngortinneqaraluarmalluunniit suli akissarsiatigut atukkat tunngaviinik ajoqusiisoqartoq unnerlugu.

Aamma nunat allamiut uagutsinnut atugassarititaasunik suli atugassaqartinneqanngittuartillugit narrujuummeqqanini minnerulernavianngitsoq SIK-p siulittaasuata oqaatigaa. Nunanimi avannarlerni allani taama annertutigisunik suliffeqarfissuarliortoqartillugu nunani taakkunani isumaqatigiissutit atuuttut atuutsinneqartarneri tikkuartuuppai.

- Maanga kikkulluunniit suliartussagunik maani isumaqatigiissutit atuuttut atuutsinneqartariaqarput. Sverigemi, Norgemi Islandimilu aamma storskalaprojekteqartarnikuupput, taakkunanilu nunani isumaqatigiissutit avataaniit suliartortunut aamma tamatigut atuutsinneqartarlutik. Professorimmi ima oqaraluarput: Social Dumping-i atunngikkaanni maani storskalaprojektit pilersinneqarsinnaanngillat. Nunanili taariikkanni isumaqatigiissutaasut atorlugit storskalaprojektiliortoqarsinnaappat taava sooq maani nunatsinni isumaqatiissutit atuuttut atorneqarsinnaassanngillat?, SIK-p siulittaasua Jess G. Berthelsen taama apeqqusiivoq.

Suliffeqarfissualiornernut inatsisissatut siunnersuut oktobarip 18-iani siullermeerutaasumik Inatsisartuni eqqartorneqassaaq.