Kinamiu nakkutilliisoq, Royal Greenlandip Sisimiuni suliffissuaniAssi: Royal Greenland

Kinamiut Royal Greenlandip Sisimiuni suliffissuanut nakkutilliiartortut

Royal Greenlandip Sisimiuni suliffissua kinamiut oqartussaasuinit aasaq manna nakkutilliinermut atatillugu misissuiffigiartorneqarpoq. Nakkutilliineq nunatta aalisakkanik suliffissuaqarneranut pingaaruteqarluinnartoq.

Kinamiut nakkutilliisut suliffissuarni pissutsit misissoriartorlugit Nunatsinnukarput. Kinamiut nakkutilliisut nakkutilliinerat pitsaanngitsumik inerneqarsimagaluarpat, aalisakkanik nunatsinneersunik nioqquteqarneq unitsinneqarsimassagaluarpoq.

-  Kinamiut nakkutilliisuisa Kalaallit Nunaanni suliffeqarfinnik avammut aalisakkanik niueruteqartunik takusaajumasimanerannik pissuteqarpoq, Royal Greenlandimi pitsaassusilerinermi immikkoortortaqarfimmi ingerlatsisoq Dorthe Korsgaard suliffeqarfissuup tusagassiorfinnut nalunaarutaani taama oqarpoq.

Kinamiut nakkutilliisut Sisimiuni ulluni pingasuni tikeraarnerini Danmarkimi Inuussutissalerinermut aqutsisoqarfimmit aallartitat, Danish Seaafoodimit aallartitat, Kinami Royal Greenlandip immikkoortortaqarfiani pisortaq aammalu Royal Greenlandimi pitsaassusilerinermi immikkoortortaqarfimmi ingerlatsisoq peqataapput.

Royal Greenland siumoortumik paasitinneqareersimavoq nakkutilliiartortut misissukkatik iluarinngippatigit nunatsinni suliffeqarfiit allat Kinami niuerfissuarmut avammut niuersinnaanermut akuersissutaat atorunnaarsinneqassasoq.

- Tassa Sisimiuni Royal Greenlandip tunisassiorfianut nakkutilliiartorneq suliffeqarfiit Kalaallit Nunaannersut avammut niueruteqarsinnaanermut akuersissummik peqartut Kinamut avammut niueruteqarsinnaanermut akuersissutaasa ingerlaannarsinnaaneranik aalajangiisuuvoq, Dorthe Krogsgaard oqarpoq.

Allaaserisaq assip ataani nangeqqissaaq

Qujanartumillu Kinamiut nakkutilliisut takusatik iluarisimaarpaat, pitsaassusilerinermi immikkoortortaqarfimmi ingerlatsisoq nassuiaavoq. Tikeraat nakkutillinerminni tunisassiorfimmi tunitsivik, tunisat kiassusiat minnerunngitsumillu pitsassusiat misissorpaat.

Tamatumunngalu peqatigitillugu danskit oqartussaasuisa Royal Greenlandip suliffissuanik nakkutilliinerat aamma misissuiffigaat. Pitsangorsaataasinnaasunillu kissaatigineqartut ataasiakkaat eqqaassanngikkaanni, nakkutilliineq 'akuerineqarnermik' inerneqarpoq.

Tikeraartorneqarnera aalisakkanik suliffissuaqarnermut tamarmut pingaaruteqarluinnaraluartoq tikeraat aamma allanik sammisaqartinneqarput. Kinamiut nakkutilliisut Sarfannguanut tikeraarnerminnut atatillugu aamma aalisartinneqarput, inuunerminnilu siullerpaamik aalisakkanik pisarlutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat