Sermitsiaq.AG: Kinamiut ingerlatseqatigiiffissuat nunatsinni mittarfiliortiternissamit tunuarterpoq

Ingerlatseqatigiiffissuaq Kinami naalagaaffimmit aqunneqartoq, nunarsuarmi kaaviiaartitsinikkut annerpaavoq, nunatsinnilu attaveqaqatigiinnikkut suliniutit maannamut annersaannit tunuarterpoq:

- Nuummi Ilulissanilu suliniutini marlunni neqerooruteqassanngilagut, Debin Song, Kinamiut sanaartugassanik suliakkerneqartartut Europami nunanilu arabiamioqarfiusuni niuerneranni pisortaq oqarpoq.

AAMMA ATUARUK Mittarfiit sanaartornissaannut neqerooruteqarnissamut piffissaq sivitsorneqartoq

Ingerlatseqatigiiffiup Kalaallit Nunaanni sulinerani taanna sivisuumik akuusimavoq, CCCC-lli mittarfissanut neqeroorniannginneranut suut pissutaanersut, Debin Songip Sermitsiamut oqaluttuarinianngilaa.

Ingerlatseqatigiiffiup ingeniøriisa Kalaallit Nunaannut isersinnaanissaat, paasissutissanillu amerlanerusunik pissarsiniarnissaq ajornakusuussasoq, CCCC isumaqarpoq, soorlu aamma CCCC-p sulisuisa Kalaallit Nunaannut isernissaminnut, sulinissaminnilu akuerineqarsinnaannginnissaat aarleqqutigigaat.

AAMMA ATUARUK Nuummi mittarfiup tallilerneqarnissaa akerlerigaat

China Communications Construction Company, nunatsinni mittarfiliortiternissamut ukiup aappaata qeqqa soqutiginnikkaluarpoq.

CCCC-p mittarfissanut neqeroorniarunnaarneratigut suliffeqarfiit neqeroorniartut maanna tallimaannanngorput, tassappullu suliffeqarfiit Danmarkimeersut marluk, Canadameersut marluk Hollandimeersorlu.

Suliffeqarfiit pineqartut neqeroorutitik kingusinnerpaamik juunip ulluisa 14-ianni tunniuttussaavaat.