Mittarfiit sanaartornissaannut neqerooruteqarnissamut piffissaq sivitsorneqartoq
Neqerooruteqartut Nuummi Ilulissanilu mittarfinnut sanaartornissamut neqeroorutiminnik naammassinninnissaannut sapaatit akunnerinik marlunnik sivitsuiffigineqarput.
Taamaattoq piffissarititaasoq killigititaasullu sinneri allannguuteqanngitsut, Kalaallit Airportip nalunaarutigaa.
Neqeroorutinik tunniussinermut piffissarititaasoq maajip ulluisa 15-annit maajip 31-anut sivitsorneqarpoq. Kalaallit Airports Internationalip sanaartornissamut piukkunnaatillittut nalilerneqarsimasut nalunaarfigai.
- Sanaartornissamut neqerooruteqartut piffissamik sivitsuinissamik noqqaassuteqarfigaativut, neqeroorusiornerminni sapinngisamik naammattumik najoqqutaqarlutik tunngavilersuinissamut pisariaqartitsimmata, Kalaallit Airportsimi, pisortaaneq, Peter Wistoft oqarpoq nangillunilu:
- Tamannalu uagutsinnut neqerooruteqartunullu pingaaruteqarluinnarpoq, neqeroorutimmi tamarmik tatiginartuunissaat, suliarilluagaanissaat aamma tamakkiisumik uppernarsarsimanissaat pingaaruteqarpoq, taamaammat neqerooruteqarnermut piffissarititaasoq sapaatit akunnerinik marlunnik sivitsorparput.
Kinguartitsineq neqerooruteqartunut tamanut atuuppoq.