Simon Simonsen: Kinamiut ernummatigisariaqanngillat
Nunatsinni mittarfiit Kinallu oqallisigineqarnerat silatusaarluni ingerlanneqassasoq Simon Simonsenip kaammattuutigaa.
AAMMA ATUARUK Danskit partiivisa arlaqartut kinamiut suliarinninniarnerat ernumanartoqartikkaat
Mittarfissanut suliariumannittussarsiornerit Danskit naalakkersuisoqarfiannit nunanut allanut tunngasunut suliassanngorsinnaassangatinneqartoq attaveqaqatigiinnermut naalakkersuisumit taama isigineqanngilaq.
- Imaanngilaq tassa taakkua suliarisussaassagaat suliassaq una. Taannalu pitinnagu qallunaat naalakkersuisuisa utaqqimaalaaqqaartariaqaraat imaassinnaammammi kineserinik toqqaasoqanngitsoq, Simon Simonsen oqarpoq.
AAMMA ATUARUK Kinamiut mittarfinnik suliaqartinneqarnissaanik USA mianersoqqusivoq
Kinerserit suliffeqarfiutaat China Communication Construction Company mittarfiliornissamut piumasaqaatinut naammassinnittut suliffeqarfiit arfiniliusut ilagigaat aamma oqaatigaa.
Sulili aalajangiisoqanngilaq.
- Pilersaaruteqarunik aaliangersimagunillu namminneq sanaartornissaat akisussaaffigisussaavaat ingerlallugulu, sanaartortinnissaallu. Soorunami aamma pisariaqartitsinissaq malillugu nunani allani suliariumannittussarsiuussinissaminnut periarfissaqarput.
Taamaammat ministeriuneq suli aalajangiisoqanngimmat eqqissiimisariaqartoq Simon Simonsenip kaammattuutigaa.
- Qularutiginngilara Kim Kielsenip kissaatigineqartutut qallunaat naalakkersuisut siulittaasuannut Lars Løkkemut oqaloqatiginnissutigiumaassagaa. Piffissaq taanna takkuppat takujumaarparput, Simon Simonsenip oqarpoq.