Kinami Sanyami takornariat 80.000-t missaat mattussisoqarnerani kanngittut

Kinap kujataani qeqertami Hainanimi takornariat 80.000-it illoqarfimmut Sanyamukartut ingerlariaqqissinnaajunaarput corona pillugu mattussisoqarmat.

Nutaarsiassaqartitsivik AFP taama allaaserisaqarpoq.

Sanya nunarsuarmi tamarmi tusagassiorfinnit ilisimaneqarpoq, Kinap Hawaiatut taagorneqarami sissarinnera saarlisaarfigineralu pillugit.

Timmisartut qimuttuitsullu Sanyamukartut Sanyaminngaaniilu aallartussat oqartussaasunit arfininngornermi taamaatinneqarput.

Taamaaliortoqarpoq coronamik tunillatsissimasut 263-it paasineqarnerisa aqaguani.

AAMMA ATUARUK Wuhanimi inuit akornanni 1 millionit missaanniittut aneqqusaajunnaartut

Angalasut ulluni kingullerni arfineq-marlunni coronamik tunillatsissimannginnermik uppernarsaammik takutsitseqqaarlutik Sanyamit aallarsinnaapput.

Takornariat Illoqarfimmi Sanyami akunnittarfinni unnuinermi affaannarmik akiliisinneqartarnissaanik akunnittarfiit peqquneqarput, killilersuinerit atorunnaarsinneqarnissaasa tungaanut.

Kina nunarsuarmi kisiartaalluni coronartoqanngilluinnarnissaanik politikkeqarpoq.

Sukannersumik killilersuisoqarnerani innuttaasut sivisuumik aneqqusaajunnaartarput sorpassuillu matoqqatinneqartarlutik.

Assersuutigalugu Shanghaimi 25 milliuuninik inulimmi qaammatinni marlunni aneqqusaasoqanngilaq sorpassuillu matoqqatinneqarlutik.

Kinamut killeqarfiit ukioq 2020-p aallartinneranili matoqqatinneqarput coronamut politikki pillugu.