Kinami nunarput oqaluuserissanngilaat
Danmarkimi naalakkersuisut siulittaasuata Kinap præsidentia Hu Jintao sapaatit akunneranni tullermi tikeraalerpagu, Nunarput oqaluuserisassanut ilaanngitsoq, Naalagaaffeqatigiit siuttui Igalikumi ataatsimiimata, statsministerip neriorsuutigisimavaa.
- Akornatsinni isumaqatigiissutaasoq unaavoq, Nunatsinnut attuumassuteqartumik nunat tamalaat akornanni oqaluuserisassaqartoqassappat, uagut peqataasassasugut, Kuupik Kleist oqarpoq.
Kinap præsidentia Hu Jintao Danmarkimut pisortatigoortumik juunip qiteqqunnerani tikeraarmat, Nunarput sinnerlugu peqataasoqanngimmat naammagittaalliortoqaqaaq.
Tassami Kina Issittumi siunnersuisoqatigiinni ilaasortanngorusuppoq, taavalu aamma nunat nunarsuarmi inuttunersaat aatsitassanik qaqutigoortunik kisermaassingajalluni tunisassiortuuvoq.
Maannalu Danmarkimi naalakkersuisut siuttuat akisilluni tikeraalermat, Nunatsinniit peqataasoqarnissaanik piumasaq tutsiuteqqippoq.
Inuit Ataqatigiit sinnerlugit Folketingimut ilaasortaq, Sara Olsvig, aamma Siumup siulittaasua, Aleqa Hammond isumaqarput, ministeriunerup tikeraarnermini Nunatsinni aatsitassarsiorneq, aamma Issittumi isumannaallisaaneq oqallisigilerpagit Nunarput peqataatitaqartariaqartoq - taakkumi pillugit Kinap soqutiginninnerujussuani arlaleriarluni ersersittareermagu.
Sara Olsvig oqarpoq, pisuni taamaattuni ministeriunerup oqaasissani mianersuuttariaqarai, eqqaamasariaqaraalu Nunarput oqaluuserineqassatillugu, Nunatta peqataanissaa pisariaqarluinnarmat.
Siumup siulittaasuata Aleqa Hammondip Sara Olsvig isumaqatigaa. Taanna oqarpoq, Nunarput oqaluuserineqassatillugu Danmarkimi naalakkersuisut Namminersorlutik Oqartussaneersunik qaaqqusisarnissaat pissuserissaarnerussagaluartoq.
Kisianni tassa Nunarput oqaluuserineqassanngilaq. Statsministerip Kuupik Kleistimut tamanna Igalikumi ataatsimiinnermi neriorsuutigisimavaa.
- Naalagaaffeqatigiit Igalikumi qanittukkut ataatsimiinneranni tamanna eqqartorparput, aamma Kinamukarnissaanut tunngasumik eqqartuivugut.
- Imatut oqarusuppunga; Nunatsinnut tunngassuteqartumik oqaluuserisassaasa akornanniittoqarpat, taava Danmarkimi naalakkersuisut pisussaapput minnerpaamik ilisimatissalluta, peqataanissarpullu isumagissallugu, Naalakkersuisut siulittaasuat, Kuupik Vandersee Kleist taama oqarpoq.
