ASSIT Kinaassuseq ileqqutoqqaniippoq

Kakiuisartut Maya Sialuk Jacobsen Paninnguaq Lind Jensenillu siulitta ileqqutoqaat uummarsaqqippaat. Ileqqutoqqat oqaluttuariinnanngilaat. Kiinaammi tamatumunnga aamma ersiutaapput.

Allattoq Paninnguaq Steenholdt

septembarip 23-at 2018 11:15

- Kinaassutsip ilisimaarilluarnissaa pingaaruteqarsoraara, isumaqarpunga kulturerisaq paasisimasariaqartoq, Maya Sialuk Jacobsen, ukiuni qulinngulersuni inuiaat Inuit kakiueriaasaannik ilisimatusarsimasoq oqarpoq.

Ileqqutoqaq puigaq arnat marluk uummarsaqqippaat. Uummarsaaqqittullumi arnaanerat nalaatsornerinnaanngilaq, issittumimi inuit ileqqutoqaat, arnat aallutatoqaraat.

Nunatta Kitaani Nunavumilu Canadami inuiaat Natsilimmiut kakiorneqarnerpaasimasunut ilaapput. Ileqqutoqarli issittumi tamarmi ilisimaneqarlunilu aallutarineqarsimavoq.

Kakiorneqarneqartarneq ullumikkut kusassaataaneruvoq, soorlu naasunik, delfininik assigisaannillu. Uffa qanga inuit kakiueriaasaat annanniarnermut attuumasuusoq.

Kakiusarneq: Kakiuineq nunarsuarmi tamani takussaavoq, ilisimaneqanngilarli qanga Inunniit kakiuneq atorneqalersimanersoq. Kakiuineq ujaloq paaterneqarsimasoq atorlugu ingerlanneqartarsimavoq, taannalu ammip iluatigut ingerlaartinneqartarsimavoq meqqut atorlugu, taamaasiornikkullu qalipaat paaminngaanneersoq kakiuinermi qalipaatigineqartarsimavoq. Angutit kakiorneqarsinnaasarput, kisiannili arnaanerusimapput kakiorneqartartut. Arnat kakiortinneri meeraanermiit inuusuttuaranngornermut ileqqutut atorneqartarsimapput. Angutillu kakiorneri piniagarisimasanut nalunaarsuutitut atorneqartarsimallutik, soorlu arferup pisarisimasap tarninga kakiorneqartarsimalluni. Najoqqutaq: Nunatta Katersugaasivia Allagaateqarfialu

- Kakiortinnerit piniagassaqarnissamut, annannissamut nappaatinullu illersuutitut iluaqutaasut taamani upperilluinnarpaat. Aammalumi inuiaanni Inunni kikkorlerneernermik takussutissatut atorneqartarlutik, Maya Sialuk Jacobsen oqarpoq.

Kakiuisarneq taarserneqarpoq

Hans Egede ajoqersuiartortitaalu takkummata ileqqutoqaq inerteqqutaalerpoq. Taamaalillunilu kakiuisarneq kristumiutut upperisaqalernermik taarserneqarpoq, taanna oqaluttuarpoq.

Ilaatigut Maya Sialuup Paninnguaq Lind Jensenillu sulineratigut kakiueriaasitoqaq ullumikkut, Hans Egedep tikinneranit ukiut 300-nngullartullu, nunatsinni takussaaqqilerpoq. Ilisimalikkatillu ingerlateqqikkumallugit sineriatsinni maannakkkut angalapput.

Inuit kakiueriaasitoqaat kinaassutsimut attuumassuteqartoq, Maya Sialuup oqaatigaa.

- Kulturerput torraageqaara, isumaqarpungalu pingaaruteqartoq ileqqutoqqat oqaluttuareqqinnissaat, tamanit aamma ilisimalerneqarniassammata.

Nunatsinni inuit kakiueriaasaannik qassit kakiortissimanersut ilisimaneqanngilaq. Hundredejulikkaalli kakioreersimallugit, Maya Sialuup oqaatigaa.

Taamatullu kakiortinneq inunnut amerlasuunut assiginngitsutigut sunniuteqartarpoq:

- Amerlasuut misigissutsikkut aalassattaqaat. Kiinaatigut kakioreeraangakkit ima oqartunik tusakulavunga: "Kinaassusera aatsaat takulerpara, imminut aatsaat takulerpunga", Maya Sialuk Jacobsen oqarpoq

Misissorsimasani paasisanilu tunngavigalugit atuakkiorumaarluni, taanna neriuppoq.

Angut kalaaleq ileqqutoqaq atorlugu kakiortittoq uani videomi takusinnaavat:

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.