Qujaukitsup Taiwanimut tikeraarnissaralua Kinamit unitsinneqartoq
Vittus Qujaukitsup tunisanik amerlisaaniarneq, Greenland Day, Taiwanip illoqarfiisa pingaarnersaani Taipei siorna novembarip aallaqqaataani ammartussaagaluaraa, Danmarkip Taiwanimut tuniniaanermi siunnersuisoqatigiivisa qaaqqusissutaani siullermi ersippoq.
Kisianni kalallit inuussutissarsiornikkut piginnaasaat aamma aatsitassarsiornermi, takornariartitsisarnermi aalisakkanillu tunisassiornermi aningaasaliinissamut periarfissat ukkataralugit tunisanik amerlisaaniarneq aallartimmat, Qujaukitsoq peqanngilaq.
Naalagaaffeqatigiit Taiwan akuerinngikkaat
Danmarkip Taiwan naalagaaffittut namminersortutut akuerisarinngilaa, Kinali taamaallugu. Taamaammat taamaatitsineq Kinap nunanut allanut tunngasunut ministereqarfianiit arlaleriarluni saaffigineqarnermik Berlingskep paasissutissarsiai naapertorlugit peqquteqarpoq. Kalaallit ministeriannik Taiwanimut tikeraartoqalernera ernumanartoqartikkitsik, ministereqarfiup Kinami naalakkersuisut sinnerlugit erseqqissarpaa.
AAMMA ATUARUK Nunatsinneersut tuniniagassanik Kinami pilerisaarinerat
Taamaammallu Kinamut attaveqarneq ajoquserumanagu, pisussat taakkutitaat taamatinneqarpoq. Kisianni inuussutissarsiornermut, aatsitassanut sulisoqarnermullu naalakkersuisoqarfimmi pisortaq KNR-imut mailikkut allagaqarluni oqaluttuarpoq, Taiwanimi politikerinik ataatsimeeqateqarnissaq pilersaarutaasimanngisaannartoq.
- Angalanissaq ministerillu najuunnissaa Kalaallit Nunaanni oqartussanit atuumassuteqartunit aalajangigaavoq. Taiwanimut pisortatigoortumik attaveqannginneq peqqutigalugu, ministerip niuernikkut amerlisaarniarnerup ilaani tssani peqataanissaa salliutinneqanngilaq. Kalaallit Nunaata Danmarkip beijingimi aallartitaqarfia tikeraarnissap piareersarnerani ukiuni siuliinisulli suleqatigaa, Danmarkillu ataasiinnarmik Kinaqarneranik politikkia ilisimaaralugu, Jørn Skov Nielsen allappoq.
Danmarkip ataasiinnarmik Kinaqarneranik politikkiminik allanngujaatsitsinera, Kinap nunanut allanut tunngasunut ministereqarfiata Berligskemut allalluni nuannaarutigaa, Kalaallit Nunaatalu naalagaaffeqatigiinni namminersortutut danskit nunanut allanut politikkiat malittariaqaraat isumaqarlutik.
Vittus Qujaukitsup Taiwanimut tikeraarnissaminik taamaatitsinini pillugu KNR-imut ilassutissaqannginnerarpoq.
AAMMA ATUARUK Qaleralinnut nunatsinneersunut akitsuut Taiwanip affaannanngortikkaa