Qaleralinnut nunatsinneersunut akitsuut Taiwanip affaannanngortikkaa
Taiwan maannakkut nalunaaruteqarpoq, - Nunanut Allanut Pisortaqarfiup saaffiginninneratigut - siunissami tunisassianut Nunatsinneersunut Most-Favoured-Nation aallaavigalugu ilanngaaserinermut akigititat atorneqalissasut.
Most-Favoured-Nation-imi ilanngaaserinermut akigitinneqartartut - MFN - nunarsuarmi nunat tamalaat niueqatigiinnikkut suleqatigiiffianut, WTO-mut ilaasortaanikkut anguneqartarpoq. Danmarkilu WTO-mi ilaasortaammat, Nunatsinnut Naalagaaffeqatigiinneq aqqutigalugu tamanna aamma iluaqutaavoq.
Taamaalillutik aalisakkat Nunatsinniit tunisassiarineqartut, Taiwanimi niuerfinnukaanneqarneranni ilanngaaserinermut akigititat appasinnerusut siunissami atorneqartalissapput.
Nunarput siornatigulli avammut qaleralinnik Taiwanimut tunisaqartareerpoq. Taiwanimi aningaasaqarneq Asiami annertunerpaat tallimassaraat. Ukiumullu 8.000 - 10.000 tonsit tikillugit qaleralinnik eqqussuisarnermi, Nunatsinnut aalisakkanik avammut niuernermut annertoorujussuarmik periarfissaqarfiulluni, Taiwan niuerfittut pingaaruteqartorujussuummat, tamanna nutaarsiassatsialassuuvoq.
Qalerallit Nunatsinneersut siunissami 25 procentimik ilanngaaserinermi akeqartitsiviussapput, maannamut 50 procent atorneqartartoq atorneqarunnaassalluni.
Niuernermut Naalakkersuisoq, Vittus Qujaukitsoq nuannaarpoq:
- Naalakkersuisut niuernerup siuarsarneqarneranik suliaqarnermik salliutitsinerat, avammut niuernermik suliaqarnermut aningaasarsiortitsisinnaasumik aalajangersimasumik inerneqarluni piviusunngoreermat nuannerpoq. Niuernermik siuarsaaneq, nunatta aningaasaqarnikkut imminut nammassinnaalernissaata qulakkeernissaani, pingaaruteqartunut ilaavoq, Niuernermut Naalakkersuisoq oqarpoq.
