Kina siulittaasuussanersoq ataatsimeersuarnermi aalajangerneqarumaarpoq
Atassut qinersisartorpassuit isaanni partiiuvoq utoqqaat partiiat nutaanngorsarfiunerminut ersiuteqarfiunngitsoq, tamannalumi partiip qinersinermi kingullermi malugilluarpaa. Namminersornerunerup 1979-imi eqqunneqarnerata kingorna qinersinermi siullermi Atassut partiit anginersaraat, qinersinermili matumani Atassut Inatsisartuni marluinnaq ilaasortaatitaqarpoq.
-Siulittaasuuffiup oqaluuserinissaamut maanna piffissaanngilaq. Naalakkersuisunngortitsiniarluni isumaqatigiinniarnerit siullertut isumagissavagut, kingorna partiip siunissaa eqqartorumaarparput. Uanga isumaga malillugu tamakku partiip ataatsimeersuarnerani isumagisassaapput, Gerhardt Petersenilu maannamut siulittaasoraarput. Siulittaasutut qinigaanikuuvoq, qineqqusaarnermilu annertuumik suliaqarsimalluni, Steen Lynge knr.gl-imut oqarpoq.
Nunatsinni partiini allani siulittaasunut allanut naleqqiutissagaanni Gerhardt Petersen qinersinermi taaguunneqarnera ajorluinnarpoq. aleqa Hammnond 6.818-inik taaguunneqarnerluni siuttuuvoq, tulleraa Kuupik Kleist 4.369-inik taaguunneqartoq, pingajuattut inissisimavoq Partii Inuit siulittaasuat Nikku Olsen 1.116-inik taaguunneqartoq, Demokraatit siulittassuat 513-inik taaguunneqarpoq, Kattusseqatigiit Partiiata siulittaasua Anthon Frederiksen 225-inik taaguunneqarluni Inatsisartunut qinigaanngitsoorpoq kingulllersaallunilu inissisimavoq Gerhardt Petersen 216-iinnarnit qinerneqartoq.
-Piffissap arlaartigut allatut ilusilimmik saqqumilaalernissarput qularutigineqassanngilaq, partiinut tamanut tamanna atuuppoq. Taava ilaasortatta aalajangerumaarpaat kina Atassutip siulittaasorissaneraa. Tamatumunnga qinigassanngortinnissara tunuartikkumanngilara, kisianni qinersineq qinersinermilu sulinerput pillugu parteeqatikka oqaloqatigereerukkit aatsaat isummerfigiumaarpara, Steen Lynge oqarpoq.
