Kim Kielsenip Demokraatit neriuuteqarfigai

Naalakkersuisut siulittaasuata Inuit Ataqatigiit isumaqatiginninniarnermut peqataajunnaarnerat uggoraa, Demokraatilli neriuuteqarfigalugit oqarpoq.

- Inuit Ataqatigiit taamatut allakkanik apuussaqarsimanerat tusaatissatut tiguarput massakkullu Demokraatit saattussaassavakka, neriuuteqarfigissavakkalu suleqatigiinnissamut periarfissamik peqassasoq, Naalakkersuisut siulittaasuat Kim Kielsen oqarpoq.

AAMMA ATUARUK Inuit Ataqatigiit isumaqatiginninniarnernit anipput

Tassa Naalakkersuisoqatigiit amerlanerussuteqaqqilissappata Kim Kielsenip Demokraatit naaperiartariaqalerpai.

Demokraatit Kim Kielsen isumaqatigiinniarlutik siullermik tallimanngormat naapippaat, pingasunngorpallu naapeqqissagitsik, Demokraatit siulittaasuata Niels Thomsenip KNR-imut uppernarsarpaa. Isumaqatiginninniarnerilli pillugit annerusumik oqaaseqarusunngilaq.

AAMMA ATUARUK IA naalakkersuisooqatigiinnissamut isumaqatigiinniarnissamut piumasaqaateqartoq

Demokraatinullu isumaqatiginniarnerit iluatsinngitsuusangaluarpata qanoq pisoqassanersoq Naalakkersuisut siulittaasuat aperiganni ima akivoq:

- Tassa taanna paasinarsiumaarpoq. Kisianni uanga neriuuteqarpunga aamma uani Demokraatit tallimanngormat oqaloqatigigatsigit isumalluaqaanga oqaloqatigiinnitsinnut, Kim Kielsen oqarpoq.