IA naalakkersuisooqatigiinnissamut isumaqatigiinniarnissamut piumasaqaateqartoq

Kanngunarpoq, Inuit Ataqatigiit siulittaasuat, Sara Olsvig Partii Naleqqap naalakkersuisooqataajunnaarnera pillugu oqarpoq. IA nutaamik naalakkersuisooqatigiinnissamik isumaqatigiinniarnissamut piareersimavoq, IA-lli Siumullu suleqateqalissaguni pingaarutlinnik piumasaqaateqarpoq.
Assi © : KNR
Allattoq Anton Gundersen Lihn
septembarip 10-at 2018 06:03

- Nunatsinni politikkikkut eqqissiviilliortoqarnera akuersaarneqarsinnaanngilaq. Tamanna tukappoq nunatsinnullu nuanniilluni, Inuit Atqatigiit siulittaasuat Sara Olsvig oqarpoq.

Taanna Partii Naleqqap naalakkersuisooqataajunnaarluni sapaammi nalunaaruteqarnerata kingorna sakkortuunik taama oqaaseqarpoq.

Naalakkersuisooqatigiinnissamut isumaqatigiissummik sumiginnaaqattaarnerit mittarfinnullu pilersaarutinut danskit tapiissuteqaqataariataarsinnaanerat partiimut ingasappallaalersimasoq, Hans Enoksenip KNR-imut oqaatigaa.

AAMMA ATUARUK Partii Naleraq Naalakkersuisooqatigiinnit peqataajunnaartoq

Naalakkersuisut siulittaasuat, Kim Kielsen siulittaasutut ingerlaannassalluni periarfissallu misissussallugit KNR-imut oqaatigaa. Inuit Ataqatigiillu aperissagaluarpagit IA piareersimasoq, Sara Olsvig oqarpoq.

- Kim Kielsenip suli qaaqqunngilaatigut, qaaqquppatigullu oqaloqatigiinnermi peqataarusuppugut. IA akisussaaffimmik tigusinissamut piareersimavoq, Inuit Ataqatigiit siulittaasuat oqarpoq.

AAMMA ATUARUK Kielsen naalakkersuisooqatigiinnik nutaanik pilersitsiniassasoq

Inuit Ataqatigiilli Siumullu naalakkersuisooqatigiilissagaluarpata, IA pingaarutilinnik piumasaqaateqassaaq.

- Siumumi eqqissisimanersut apeqqutaavoq. Suleqatigiikkusussinnaanitsinni tamanna pingaaruteqarpoq.

Hans Enoksenip tusagassiortunik katersortitsinermini Naalakkersuinikkut Ataqatigiissaarisoqatigiit, tassa naalakkersuisooqatigiit partiivisa siulittaasui, naalakkersuisooqatigiit pilersinneqarneraniilli ataatsimiissimannginnerarai Sara Olsvigip eqqaavaa. Tamannalumi Sara Olsvigip ilisaraa.

- Naalakkersuisooqataanitsinnit tamanna misilittagaqarfigaarput. Kim Kielsenip aqutsinerani ataqatigiissaarinissaq piumassuseqarfigineqanngilaq, tamannalu aaqqiissuteqarfiusariaqarpoq, Sara Olsvig oqarpoq.

AAMMA ATUARUK Partii Naleraq uani naalakkersuisooqataajunnaarpoq

Politikkimullu atatillugu Inuit Ataqatigiit aamma piumasaqaateqarput.

- Kingullermi isumaqatigiinniarnitsinniit qaammaterpassuit qaangiutinngillat, taamaammat suleqataanissatsinnut suut akuerisariaqarnersut Kim Kielsenip nalunngilaa. Tamatumani aalisarnermut inatsit mittarfinnullu tunngatillugu silatusaarnerusumik ingerlariaaseqarnissaq ilaatigut ilaapput, Sara Olsvig oqarpoq.

Inuit Ataqatigiit siulersuisui ataasinngornermi ataatsimiigiaqquneqartut, siulittaasup ilisimatitsissutigaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk