Kim Kielsen misiginneqataalluni allagaqartoq

Ataqqinartorsuup Kunngikkormiutut Ataqqinassusilik Prins Henrik toqukkut qimagussimasoq pillugu nalunaarutaa aliatsangaaqalutik tigusimagaat Kim Kielsenip allaaseraa:

- Naalakkersuisut Kalaallillu Nunaanni innuttaasut tamaasa sinnerlugit misiginneqatiginninnerput apuukkusuppara. Prins Henrik-up qimagunnera tamatsinnut itisuumik attuivoq, Naalakkersuisut siulittaasuat Kim Kielsen allappoq, imalu nangilluni:

- Inuunermini sivisuumi Prins Henrik-up Kalaallit Nunatsinnut soqutiginninnera pisoqartillugulu kajumilluni najuukkumasarnera immikkut nuannaarutigalugulu qamuuna kissalaartitsisarpoq. Ukiorpassuarni Illit Prinsillu Kalaallit Nunatsinnut tikeraartarnissinni, pisoqarfiusartunilu allani peqataasarnissigut Prinsip Kalaallit Nunatsinnut attuumassuteqartuni atituumik kissalaartumillu akuusarnera malugilluartarparput. Akuuffigisimasaalumi amerlaqaat, kalaallit nerisassaataannik atuinermiit avammut tunisassiortarnitsinnut, meerartatta aarlerinartumik inissisimaffeqartut sullinniarneranni ikiuuttarnermut, nalitsinnilu eqqumiitsulioriaatsitsinnut nammineq taalliami kalaallisuunngorlugit saqqummersinnerinut allaat akuusarsimavoq, Kim Kielsen, Ataqqinartorsuarmut Dronningimut misiginneqatiginnilluni ilaatigut allappoq.

- Kalaallit Nunaanni innuttaasunut amerlaqisunut Prins Henrik Illillu Nunatsinnut tikeraaraangassi toqqaannartumik kissalaaqisumillu illoqarfinni nunaqarfinnilu innuttaasunut kiinnertarnisi inussiarnersut nuannaarutaasarsimaqaat, Kim Kielsen oqarpoq, imatullu naggasiilluni:

- Innuttaasunut amerlasuunut tamanna puigunaatsorsiorfiusimaqaaq, Kim Kielsen, dronningimut taama ilaatigut allappoq.

AAMMA ATUARUK Prins Henrik kunngikkormiorpalaarlunilu inuppalaartuuvoq

AAMMA ATUARUK Prins Henriup toqunera annaasaqaataavoq annertooq