Kim Kielsenip Inatsisartut "mianersoqqutaat" akuerinngilaa

Pituffimmi kiffartuussinissamut isumaqatigiissutip annaaneqarnera pillugu Naalakkersuisut Inatsisartunit ataatsimoortunit sanngiippallaarsimaneragaallutik maarsimi mianersoqquneqarput.

Naalakkersuisut siulittaasuat Kim Kielsen, Nunanullu allanut Naalakkersuisoq Vittus Qujaukitsoq taamani oqaaseqarusunngillat.

Kim Kielsenili qaammat ataaseq sinnereeraalu ullumi oqaaseqarpoq.

- Mianersoqquneqanngilagut. Uagut uani oqarfigineqarpugut, aajukua Pituffimmut tunngatillugu paasissutissat, uanilu eqqartuussissuserisumut suliakkiissutigineqartoq ammasumik tunniunneqartariaqartoq, allatigullu iliuuseqartariaqartugut, Kim Kielsen oqarpoq.

Pituffimmi kiffartuussinissamut isumaqatigiissutip annaaneqarnera pillugu eqqartuussissuserisup misissuinera naammassineqarnissaa Inatsisartuni partiit tamarmik piumasarivaat.

Misissuineq suli naammassinngitsoq Kim Kielsenip oqaatigaa.