Kilisaat ikuallattoq
Kilisaat Polar Nataarnaq, Polar Seafoodimit pigineqartoq, marlunngormat ualikkut Paamiut avataaniisilluni ikuallappoq.
Inuttalli tamarmik ajunngitsut, Polar Seafoodimi siulersuisut siulittaasuata, Henrik Lethip nalunaarutigaa, kilisaatillu Nuummukaanneqarluni unnugu unnuap qeqqata missaani tikinnissaa naatsorsuutiginerarlugu, tassanilu iluarsartuunneqassasoq aamma oqaatigalugu.
Erngertumik iliuuseqarput
Kilisaatip ikuallannerata kinguneranik ajornermik pisoqarsimasinnaagaluartoq, umiarsuup naalagaata Kristen Højgaardip facebookikkut oqaluttuaraa.
- Maskinaqarfiup ikuallalernerata kingorna nilliasaat aallartippoq ualikkut nalunaaqutaq pingasunngortorlu. Taamaalisorlu pingaartuunerup maskinalerisut pisortaat uangalu itersarneqarpugut, kilisaatip naalagaa oqaluttuarpoq imalu nangilluni.
- Aquttarfimmut iserama takuakka aquttup, aalisartut og maskinalerisullu maskinaqarfimmut matut innermik pitarneqarsinnaanngitsut tamaasa matooralereeraat. Tamatumalu kingorna orsussaqarfiup matuisa matugasuaataat aallartinneqarpoq. Umiarsuullu inuttaat kisinneqarput maskinaqarfimmullu qamisaat aallartinneqarluni, Kristen Højgaard oqaluttuarpoq.
Inuttat tamarmik ajunngitsut paasineqareermat, Aasiaat Radio attavigineqarpoq ajunaalernermillu kalerrisaarisoqarluni.
Kalittaat qatserisartullu iliuuseqapallapput
Taamaalinerani qujanartumik kalittaat, Viking Madsalex kilisaatip ungasinngisaaniippoq, nalunaaquttallu akunnerinik marlunnik ingerlaareerlutillu kilisaat tikillugu kalusiuppaa Paamiuliaallugulu. Tassungalu tulaannartullu Paamiuni qatserisartut sulillutik aallartipput.
- Qatserisartut maskinaqarfimmut matu ammarnialermassuk assut tamatta pissangaqaagut, tassami aatsaat nalunaaquttap akunneri 24-it qaangiummata maskinaqarfik ammarneqarmat, kilisaatip naalagaa oqaluttuarpoq.
- Matu ammarmat takusinnaalerparput inneq nammineq qamissimasoq aamma pujoqarpianngitsoq. Ajoqusernerit aamma annikittuinnaasut takuneqarsinnaavoq. Tamanna Nuummut tikikkutta aatsaat iluamik misissorneqassaaq, Kristen Højgaard oqaluttuarpoq.
- Takusinnaavarput innerup maskinaqarfik tamaat aqqusaarsimagaa. Tamanna eqqarsaatigiinnarlugu qujanarpoq kilisaammi inuttat erngiinnaartumik sulilluarnerisa kinguneranik ajornermik pisoqarsimasinnaanera pinngitsoortissimammassuk, kilisaammi Polar Nataarnami naalagaq, Kristen Højgaard oqaluttuarpoq.
Nuuliaanneqassaaq
Taanna aamma oqaluttuarpoq, kilisaammik Aassimmik kalinneqarlutik maanna Nuup tungaanut ingerlaarusaarlutik.
Kilisaammi inuttat, kalittaammi Viking Madsaleximi inuttat, kilisaat Aassik aamma Paamiuni qatserisartut sulilluarsimaneri pillugit, kilisaatip naalagaa, Kristen Højgaard qujassuteqarpoq.
