Kikkulluunniit Greenland Airportsip ammaanersiuinerani tikilluaqqusaasut
Nuummi mittarfeqarfik ammaanersiungajalerpoq.
Nunanummi tamalaanut Nuummi mittarfissuassaq sapaatit akunnerata tulliani sisamanngornermi novembarip ulluisa 28-anni ammaanersiorneqassaaq. Tamannalu Nuummi tamarmi malunnartillugu nalliussissagitsik, Greenland Airports tusagassiorfinnut nalunaarummini allappoq.
Ammaanersiorneq kikkulluunniit tikilluaqqusaaffigisaannik Nuup Katersortarfiani ullup qeqqaniit kaffillernertalimmik aallarnerneqassaaq, Tuukkallu mittarfissuarmut merngaarnera tamaani isiginnaaruterujussuakkut toqqaannartumik aallakaatinneqassalluni. Tuukkaq Airbus A330-800neo-tut ittuusoq Air Greenlandip timmisartorsuaraa, taannalu tassa nunatta Danmarkillu akornanni timmisartuussisassaaq.
Aamma nipilersortoqarlunilu alikkusersuisoqassaaq, taamaaliortussanullu ilaasut tassaapput Hinnarik, Naja P aamma Paaliit.
Mittarfeqarfimmi aamma malunnartitsisoqassasoq
Nuup Katersortarfiani kikkunnulluunniit kaffillernerup saniatigut mittarfeqarfimmi aamma malunnartitsisoqassaaq.
Tuukkaq ualikkut ataatsimut qiteqqunnerata missaani missangatinneqarpoq, qatserisartullu biilii meeqqat tikittunut tikilluaqqusineranni tissalukaartinneqassallutik.
Naalakkersuisut siulittaasuat Múte B. Egede aamma oqalugiassaaq.
Kikkulluunniit Tuukkap minneranik takusaajartorlutik mittarfeqarfissuarmut ornigutikutsoorsinnaapput, mittarfeqarfimmili isumannaatsuunissamik nakkutilliivikkoorsinnaanavianngimmata isikkiviginnerusumukarsinnaanavianngitsut, Greenland Airports tusagassiorfinnut nalunaarummini aamma allappoq.
Qummoroortartoqassasoq
Tassa Nuup Katersortarfiani kikkunnulluunniit ualikkut tallimat tungaannut kaffillertoqassaaq, malunnartitsinerli tassunga naanavianngilaq. Tassami Nuup qiterpasissuani unnukkut qulinut qiteqquppat nipilersortoqarlunilu qummoroortartoqassaaq.
