Kiinnamigut kiitittoq: Uummannap avannaani piniartut pingasut nannumik saassutsittut

Uummannap avannaani piniartut angutit marluk sapaatip akunnerata siuliani sisamanngornermi ajoqusingaatsiarsinnaagaluarput, qujanartumilli ajornerusumik pisoqanngilaq.

Piniartut taakku angut alla pingajoralugu umimmanniarlutik piniariarsimapput, umimmassimallutillu nannumik kaattumik tassanngaannartumik saassunneqarput.

Kalaallit Nunaanni politiit pigaartuisa pisortaat, Julie Senderovitz-Bendtsen oqarpoq.

- Piniartut pingasut umimmammik aattuleruttorlutik nannumik pakasartipput. Nannup angut ataaseq siutaatigut talerperlikkut kiivaa piniartullu aappaat kiinaatigut talerperlikkut aamma kiillugu tassanilu piniartut pingajuata ungasinnerulaartumiittup qoorortuuni tigupallariarlugu nanoq aallaavaa, nanorlu qimaatillugu, Julie Senderovitz-Bendtsen oqarpoq.

AAMMA ATUARUK Aasiaat: Nanoq ilimanarmiunit pisarineqartoq

Piniartut marluk kiitittut annerusumik ajoqusinngillat – nunaqarfimminnullu aqaguani unnukkut tikikkamik pisoq aatsaat nalunaarutigalugu. Piniartut Ikerasanneersuupput, nunaqarfik Uummannamit 45 kilometerit missaannik ungasitsigisumiippoq.

- Piniartut ikerminnik napparsimavimmut takutitsiartoqquvagut. Tassami nannumit kiitinnikkut arlaanik tunillaasoqarsinnaanera eqqarsaatigigatsigu. Tamatuma kingorna oqaloqatigeqqinngilagut, sianeramilli ajunngillat, pigaartut pisortaat oqarpoq.

Piffissaq maannakkut aavariarnerup naleraa, Uummannallu avannaani nanoq inunnut qanillattortoq kisimiinngilaq.

AAMMA ATUARUK Nanoq Aasiaat eqqaanni takuneqartoq

Aasiaat qanittuani sapaatip akunnerani matumani nannuttoqarpoq, nanorlu alla aamma Ilulissat eqqaani takuneqarluni.

- Piniariat pisarsimasut nannunut kaattunut, pisat tipaannik naamalluartunut immikkut ittumik mianersornissaannik kaammattuuteqarfigaagut, Julie Senderovitz-Bendtsen oqarpoq.

Nanoq susimanersoq oqaatigineqanngilaq. Nanoq aallaaneqarami qimaavoq – pisumilu suna tamarmi sukkangaarmat nanoq eqqorneqarnersoq paasineqanngilaq.