Aasiaat: Nanoq ilimanarmiunit pisarineqartoq
Inuussutissarsiutigalugu piniartup, ilimanarmiup Frits Johansenip, nanoq Aasiaat eqqaani ippassaq takuneqartoq pisaraa.
Taassuma nanoqartoq tusaramiuk Avannaata Kommuniani piniarnermut inuussutissarsiornermullu siunnersorti pisassiissutit sinneri paasiniarlugit attavigaa.
Sulilu pisassaqartoq paasigamikku sukkasuumik iliuuseqarput: Frits Johansenimmi erninilu ilaquttatik Ilulissaniit Ilimanniaatipallappaat, tamatumalu kingorna Aasiannukarlutik. Umiatsiamillu 1 tiimi sinnilaarlugu ingerlaarsimapput.
Inuussutissarsiutigalugumi piniartut Ilulissaniit Uummannaq ilanngullugu ukioq manna katillugit arfinilinnit nannuttassiissutigineqartunit suli marlunnik pisassaqarput, Kommune Qeqertalimmi pisassatik arfinillit pisarereersimagaat.
Taamaattumik Frits Johansenip pisassiissutigineqartut sippornagit nannussinnaasimavoq.
Frits Johansen nannuttanilu.
Nannuttani qujaniarluni takuteqqaaraa
- Tupinnarpoq upperiuminaallunilu piniagarsuaq ajornartorujuk uatsinnut taamannak ajornannginaarlugu. Aasiammiunut assut qujarusuppunga paarisimammassuk. Ungoqqangamikku umiatsiamik. Alutoralugu. Taava qujaniutigalugu takusassiareqqaarusukkakku qaammarniarani ullaap tungaani, Frits Johansen oqaluttuarpoq.
Frits Johansenip nannuttami marlunngornermi angerlaatinnginnerani aasiammiunut takusassiareqqaarpaa.
Frits Johansenimmi nannumik pernartaraa.
- Massakkut Aasianniippugut takuteqqaarniarlugu inunnut ippassaq unnukkut taarsisorlu maanga pigatta inuit ussangaatilaaramik. Taava takuteqqaarniarlugu maanimiunut qujaniarnermut. Takullattaarpaat ullaap tungaaniit aamma, Frits Johansen tulluusimaarluni taama oqaluttuarpoq.
Frits Johansenip erneratalu pisartik ullumi marlunngornermi ullup qeqqata kingorna Ilimanniaappaat, kisianni Qasigiannguatigooqqaarput. Frits Johansenimmi pisani angaaminut takuteqqaarmagu.
Ilimanarmiut ilaasa Frits Johansen erneralu nannussimallutik tikimmata erfalasuaralerlutik aterfiorpaat.
Kommune Qeqertalimmi politiit KNR-imut uppernarsarpaat Frits Johansen nannunnissinnaatitaammat pisassaqarluni nannunnermi malittarisassat tamarmik malinneqarsimasut.