Ukiortaami oqalugiaat: Kielsenip maligassiuisut qujassuteqarfigigai
Immikkut pingaartillugit meeqqat ilaqutariillu atugarisaannik suli pitsanngorsaasoqarlunilu Meeqqat Ukiuat 2019-imi ingerlaqqissasasoq, naalakkersuisut siulittaasuata oqaatigaa.
- Immikkut eqqaanngitsoorsinnaanngilara suliniut KILLILIISA. Ajoraluartumik akunnitsinni artorsaativut pillugit - nipangiussisarnerput nalinginnaavoq - nunaqqatitta ilaat, Arnajaraq, Arnannguaq, Henrik, Heidi, Michael, kiisalu Gukki Nuka, taakkullusi aqqusaarsimasasi imaannaanngikkaluaqisut - sapiillusi ammasumik tamatsinnut saqqummerpusi, Kim Kielsen oqarpoq.
Isumagininnikkullu ajornartorsiutit aaqqiiviginissaat Naalakkersuisut siulittaasuata oqaatigaa.
Ukiaq - illoqarfinni arlalinni nipaatsumik ingerlaaqatigiinnertalimmik akerliussutsimik takutitsisoqarpoq, tamannalu pillugu Kim Kielsen qujassuteqarpoq - inuiaqatigiimmi immitsinnut pisariaqartittugut, Kim Kielsen oqarpoq.
- Innuttaasut iliuuseqaqataarusunnerat takoqqipparput. Niviaq Korneliussen - suliniummik aallartitsisoq minnerunngitsumillu illoqarfinni arlalinni suleqataasorpassuit ingerlaaqatigiinnermilu peqataasorpassuarnut Kim Kielsen qujassuteqarpoq - Tusaavatsigit, taamaattumillu akunnitsinni immitsinnut erligisariaqarpugut, Kim Kielsen ukiortaami oqalugiarnermini taama ilaatigut oqarpoq.
