Kialaarfik: Angerlarsimaffeqanngitsut anisittariaqartarpagut

Nuummi angerlarsimaffeqanngitsunut unnuisarfik Kialaarfik ullaap tungaani matoqqasarmat sumunnarfissarsiortarput, aamma silarlukkaluaraangat.
januaarip 23-at 2020 11:11

- Eqqiarneqarnissaa taanna uagut pingaartittorujussuugatsigu. Matusariaqartarpugut silaannarissarlugulu eqqiarneqartarmat. Silaannarissaasariarluta ammaqqittarpugut, ualikkullu silaannarissaaqqittarluta , Kialaarfimmi aqutsisoq, Storm Ludvigsen oqarpoq.

Kialaarfimmi inuit 36-it unnuinissannut inissaqartinneqarput, silarlukkaangalli sumunnarfissaaleqineq ajornartorsiutaalertarpoq. Ullaakkummi qulingiluanut aneqqusaasarput. Aatsaallu eqqiarneqareeraangat aqqanernut uteqqissinnaasarlutik.

AAMMA ATUARUK Angerlarsimaffeqanngitsut silarlukkaangat iserfissarsiortarput

Ulluinnarni Kialaarfimmi unnuisartumut allamukartariaqartarneq angerlarsimaffeqanngitsumut Karl Kristoffersenimut ilungersunartarpoq.

- Sømandshjemmemut. Sila perluppallaaqimmat. Frelsens Hæri eqqarsaatigigaluarakku ungasilaarami. Sila ajornermut. Kialaarfigiartulerpara, Karl Kristoffersen KNR-imut pingasunngornermi taama oqarpoq.

Aqutsisup oqarnera naapertorlugu angerlarsimaffeqanngitsut isersimaannarnissaannut periarfissinneqassanersut, sulisut ullaakkut ataatsimiissutigisarpaat.

- Inuit napparsimasut maaniiginnarnissaat itigartinngisaannarpagut. Pitsorlukkunik utoqqartagullu oqartarput, taava napparsimappata arlaannilluunnii pisariaqartitsippata taava ini atorsimasaa ammarneqartarpoq, Storm Ludvigsen oqarpoq.

Maaniiginnarnissamik aperisoqaranilu oqartoqanngilaq

Kialaarfimmiiginnarusuttut ullaakkut ataatsimiinnermi pilersaarusiorneqareeraangata isesimasinnaatitaasarput.

- Ataasinngormat oqartoqanngilaq maaniiginnartoqarusuttumik. Ullaakkut takkukkaangama ataatsimiinnermi oqariartuutigisassakka suliarisarpakka, taama oqartoqanngilaq, nammineq aniapput, aqutsisoq oqarpoq.

Angerlarsimaffeqanngitsut Kialaarfimmi unnuisartut, silarlutsillugu iserfissaaleqisarput. Taakku ullaakkut nalunaaqutaq qulingiluaniit aaqqarngup tungaanut kialaarfimmiissinnaaneq ajorput, Kialaarfiup eqqiarneqarnerata nalaani aneqquneqartaramik.

AAMMA ATUARUK Angerlarsimaffeqanngitsut pillugit suleqatigiissitaliortoqarnera nuannaarutigineqartoq

Abia Frederiksen angerlarsimaffeqanngitsut Kialaarfimmi unnuisartut ilagaat. Taanna oqaluttuarpoq najugaqarfiit isaariaanni kialaarniarsarisarneq ajornerpaasartoq.

- Sumunnarfissaqanngikkaangatta, blokip gangianut kialaariarsinnaasarpugut, Abia Frederiksen oqarpoq.