Angerlarsimaffeqanngitsut silarlukkaangat iserfissarsiortarput
Karl Kristoffersen Kialaarfiup silatinnguani pingasunngornermi ullaap tungaa KNR-imit naapipparput. Taanna unnuisarfimmi inissaqaraangami unnuisarpoq, inuimmi 36-it unnuinissaminnut inissaqartinneqartarput. Unnuisimasulli ullaakkut qulingiluat tungaannaanut tassaniissinnaapput.
Kialaarfiullu aqqanernut ammarnissaa utaqqillugu allamut iserfissarsiortariaqartarpoq.
- Sømandshjemmemut. Sila perluppallaaqimmat. Frelsens Hæri eqqarsaatigigaluarakku ungasilaarami. Sila ajornermut. Kialaarfigiartulerpara.
AAMMA ATUARUK "Angerlarsimaffeqarani ilungersunarpoq assoroornarlunilu"
Ulluni makkunani Nuummi sila atoruminaappoq, perserluni anorleqattaarmat. Tamannalu angerlarsimaffeqanngitsumut ilungersornartorsiortitsivoq.
Karl Kristoffersen ilaatigooriarluni Sømandshjemmemi ikiortitut sulisarpoq. Tassami apisimariaraangat silami nivalluni aputaajaasarpoq.
sømandshjemmemilu sulisarnini nuannareqaa, unnuisarfimminummi qaninneruvoq.
Isaarissani kissassimaarniarsarisarput
Karl Kristoffersen silarluttumi Nuup illoqarfittaaniikkaangami arlaannut iserfissarsiortariaqartarpoq.
- Nuuk Centerimut immaqaluunnit Brugsenimut kaffisoriarluni, tassa sila perlukkaangat taamatut. Tassa taamaalilluta kialaartoq taamatut ujaarisarparput, taanna oqarpoq nangillunilu.
- Kissaatiginartarualuaqaaq soorlu sumunnarfissamik, kialaariartorfissamik, matoqqanerata nalaani. Soorlu aqqanermut ammarnissaata tungaanut.
AAMMA ATUARUK Angerlarsimaffeqanngitsut pillugit suleqatigiissitaliortoqarnera nuannaarutigineqartoq
Angerlarsimaffeqanngitsut ilaat alla, Abia Frederiksen aamma unnuisarfimmi Kialaarfimmi unnuisarpoq. Najugaqarfiit torsuusaanni kialaarniarsaraluni ajornerpaasartoq, taanna oqaluttuarpoq .
- Sumunnarfissaqanngikkaangatta, blokip gangianut kialaariarsinnaasarpugut, Abia Frederksen oqarpoq.
Karl Kristoffersen ulluni makkunani niaqorlorujussuaqattaarami isersimaannarnissani kissaatigigaluarpaa.