Kerry Nunatsinnut tikeraalerpoq
Danskit nunanut allanut tunngasunut ministeriata Martin Lidegaardip John Kerrymik Washingtonimi ippassaq ataatsimeeqateqareernerani tamanna paasinarsivoq.
Ataatsimiinnermi Martin Lidegaardip John Kerry USA-p Issittumi Siunnersuisooqatigiinni siulittaassuuffeqalernissaanut atatillugu Københavnimut Nunatsinnullu qaaqquaa.
- Qaaqqusissummut qujavoq, taamaammat siunissami qanittumi tikeraarnissaa pisinnaassasoq naatsorsuutigaara, danskit nunanut allanut tunngasunut ministeriat Washingtonimut tikeraarnerminut atatillugu taama oqarpoq.
Kerryp tikeraarnissaa amerikamiut nunanut allanut tunngasunut ministeriisa nunatsinnut tikeraarnerisa siullersarissanngilaat.
Siornatigummi nunanut allanut tunngasunut ministeri republikanerineersoq Colin Powell kingornalu Hillary Clinton Demokraatineersoq nunatsinnut tikeraarnikuupput.
Nunatta, USA-p Danmarkillu suleqatigiinnissamik isumaqatigiissutaata atsioqatigiissutigineqarnissaanut atatillugu Colin Powell 2004-imi Igalikumiippoq, Hillary Clintonilu Issittumi Siunnersuisooqatigiit ataatsimiinnerannut atatillugu Nuummut 2011-mi tikeraarluni.