Kattuffiup nutaap kalaallit Danmarkimiittut ataatsimoortilerniarai

Kalaallit Danmarkimiittut ataatsimut oqaaseqalernissaat pingaaruteqarpoq. Taamak kalaallinut Danmarkimiittunut kattuffimmi nutaami “Uagut”-mi siulittaasoq Julie Rademacher isumaqarpoq. 

Julie Rademacher nammineerluni siunnersuisarfimmik suliffeqarfiuteqartoq, ukiualunni nunatsinneereerluni Danmarkimut nooqqikkami, kattuffik pillugu isumassarsivoq. Kalaaliulluni ilaanni kisimiittutut misigisarami.

Naalli aamma Kalaallit Illuini assigiinnik isumalinnik naapitsinissaq periarfissagaluartoq, ataatsimut nukittunerusumillu oqariartuuteqarsinnaasut pisariaqartinneqartut, taanna isumaqarpoq.

USA-p Kalaallit Nunaat aqulerlugulu pigilernissaa pillugu Amerikap præsidentiata Donald Trumpip oqariartuuteqareernerata kingorna, nunap suqutigineqarnerujussua aamma eqqarsaatigalugu.

- Trumpimik matumani pisoqarnerani apeqquterpassuarnilu allani, soorlu assersuutigalugu qitornama kalaallisut ilikkarnissaminnut periarfissaannik Danmarki amigaateqartoq isumaqarpunga, Julie Rademacher oqarpoq.

Julie Rademacher qallunaat kalaallilllu politikkiannut siornatigut ilaanikuuvoq. Misilittakkani maanna kattuffimmut nutaamut partiilersornertaqanngitsumut atorpaa.  Assi © : Johansen Rune/Ritzau Scanpix

Taanna Socialdemokratimi folketingimut ilaasortaanikuuvoq, atorfeqarnerminilu aamma Siumumi sulinikuulluni. Kattuffilli namminersortuullunilu partiinut attaveqanngitsuusoq erseqqissaatigaa. 

- Taamaattumik Kalaallit Inuillu Danmarkimi najugaqartutut nukittunerusumik ataatsimoortumik oqaaseqartoqalernissamut kalaallit nipaat nukittunerulertariaqarpoq. Ataatsimoornissarput pingaaruteqarpoq, oqallittarfinnilu ataatsimut oqaaseqartartuullutalu qallunaanut oqartussanut, kommuninut naalagaaffimmullu akiuulluarsinnaanerussagatta, taanna oqarpoq.

Siullermeerluni pisussaqalereertoq

Kattuffik nutaaq inunnik tallimanik siulersuisoqarpoq – taakkulu aaqqissuussillutik sulillualereerput, Julie Rademacher oqarpoq.

Kalaallinut 17.000-ngajalluinnarnut Danmarkimi najugaqartunut inuiaqatigiinni, kulturerisami aammalu ilinniarnermi suliniutinik tapersersuinissamut Uagut pilersinneqarsimavoq. Aammalu kulturimik kinaassutsimillu nukittorsaaviusinnaasunik ataatsimoorfissanik – inuiaqatigiinni aammalu ataatsimoorfiusuni avammullu pilersitsinissamut kissaateqarput.

Aamma kattuffiup ammip qalipaataanik assigiinngisitsineq akiorniarlugu suliniuteqassapput.

- Oqaloqateqarluni ataatsimeeqateqarnissat arfinillit pilersaarusiuleruttorpavut, aasami sulinngiffik qaangiuteriarpat aallartittussat. Tassani asassugaaneq, ammip qalipaataa pillugu immikkoortitaaneq eqqartorneqarsinnaasullu assigiinngitsut inuit naapillutik oqallisigisarsinnaavaat, Julie Rademacher oqarpoq.