Kattuffiit: Juulli sioqqullugu akissarserusuppugut

Naalakkersuisut aalajangiusimavaat decembarimi qaammammusiat juullereerpat tunniunneqassasut. Tamanna pillugu kattuffiit tallimat siorasaaripput Namminersorlutik Oqartussat eqqartuussisulersuunniarlugit.

Naalakkersuisut upernaaq aalajangerput decembarimi qaammammusiat juullereerpat aatsaat tunniunneqassasoq. Ileqquusimagaluarpoq juullinngilaartoq decembarimi qaammammusisitsisarneq. Allannguinerlu isumaqatigiinniarnerit aqqusaaqqaarlugit aatsaat pisinnaasoq ilinniartitsisut, atorfillit, peqqissaqarfimmi sulisut, perorsaasut sulisartullu kattuffii isumaqarput.

- Kattuffiit neriupput naatsorsuutigalugulu Namminersorlutik Oqartussat aalajangernertik novembari naatinnagu tunuartissagaat. Taamaattoqassanngippat kattuffiit piareersimapput illuatungeriit saqitsaassutaattut  (voldgiftsag) suliaq ingerlateqqissallugu, kattuffiit nalunaarput.

Naalakkersuisulli isumaqarput kattuffiit ilaasortaasa allannguutip piareersarfigisinissaa piffissaqarfigisimagaat.

- Tassami ilaqutariit meerartallit aamma nalunngilaat januaari takisooq aggersoq qaammatit allat sinnerinisulli assinginik akiligassaqarfiullunilu pisiniarfiusussaq, Aningaasaqarnermut Naalakkersuisoq Maliina Abelsen oqarpoq.

Taanna aamma nassuiaavoq juulli sioqqullugu qaammammusiat tunniuttarnerat pisariaqanngitsumik aningaasartuutaasarmat allanngortitsisoqarsimasoq. Tamanna apriilimi nalunaarutigineqarpoq.

- Allannguut siusissukkut ilimasaarutigineqarpoq ilaqutariit taakku tassunga piareersimallutillu juullip tungaanut sipaaruteqarsinnaaniassammata, Maliina Abelsen oqarpoq.