Illernit Katsorsaariaasaat angusaqarfiulluartoq
Nuna tamakkerlugu qimarnguimmi katsorsaaviutigisumi, Illernini, anaanat meeraallu inuunerminni aqqusaarsimasatik imaannaanngitsut ukiumi ataatsimi katsorsarneqarlutik qaangerniarsinnaavaat.
- Tassa uagut tigusartakkagut anaanaq meeqqallu nakuusernermik nalaataqarsimasut angerlarsimaffimmini,
Illerninilu pisortap ilaqutariinnullu katsorsaasup, Stina Mølgaardip, suleqataasalu katsorsaariaaseq pilersissimasaat Illernit angusaqarluarsimaneranut pissutaanerpaasoq Isumaginninnermut Aqutsisoqarfik naliliivoq.
- Imaappoq ilaqutariit iluanni inuk ataaseq ajornartorsiutaanngitsoq, kisianni akunnerminni ataqatigiinnerat. Taamatut isiginnittariaaseqarluta sullissivugut, Stina Mølgaard taama oqarpoq.
AAMMA ATUARUK Qimarnguik Illernit pisortatigoortumik ammarneqarpoq
Persuttaasarnerullu kinguaariit tulliinut ingerlaqqittarnera unitsinniarlugu meeqqat immikkut aamma katsorsarneqartarput.
- Assersuutigalugu meeraq anaanami ataatamilu nakuusernerata ingerlanerani akuleruttartuusimaguni, taava ingerlaannaq takusinnaasarparput aamma qaangersinnaanngikkaa.
Meeqqammi annersaasunik unitsitsiniaasarsimasut ilaatigut meeraqatitik kamaattut akuliuffigalugit unitsitsiniaasartutut imminnut inissittarsinnaasimapput, tamannali Illerninit qaangertinniarneqartarpoq.
- Immaqa taakkua meeqqat imminnut kamaattut imminermininngaannit anginerujussuungaluartut. Taava taanna pissuseq, iliuuseq, suleqatigalugu qaangertinniartarparput. Oqaloqatigiinnikkut.
AAMMA ATUARUK Tasiilami arnat nakluuserfigineqarsimasut qimarnguittaarput
Illerninilu katsorsaariaaseq ajunngitsumik naliliiffigineqarmat kommunenut siaruartinneqarnissaa anguniarneqassasoq, Isumaginninnermut Aqutsisoqarfiup kaammattuutigimmagu sulisut tigulluarpaat.
- Nuannaarutigisorujussuuarput taamatut nalilerneqarnerput, Illernini pisortaq, ilaqutariinnullu katsorsaasoq Stina Mølgaard KNR-mut taama oqarpoq.
Illernit tassaavoq arnanut persuttagaasimasunut taakkulu meeraannut nuna tamakkerlugu qimarnguik katsorsaavillu. Illernit 2014-imi Qeqertarsuarmi misiliilluni suliniutitut pilersinneqarpoq.