Katinnguaq Heilmann Jensenip pinnersaatit nunatsinni pisiarineranit akikinnerummata nittartakkatigut pisiarisarai
![](/sites/default/files/styles/image_934x467/public/2024-04/Qanorooq%2022.04.2024%20Still.jpg?itok=HvUyhHHu)
Naqqiissut: Ilanngutassiap qulequtaa nutarterneqarpoq. Attaveqaqatigiiffitsigut ilisimaneqarluartoq qinikkallu oqaloqatigiissimasutut siusinnerusukkut allassimagaluarpoq. Taakku oqatigiinngillat. KNR-ip taakku tamarmik immikkut oqaloqatigai.
Katinnguaq Heilmann Jensen, Youtubemi Instagrammimi Tik Tok-kimilu pinnersarneq pillugu videoliortarpoq.
Taassuma pinnersaatit tarngutillu nunanit allanit nittartagaq atorlugu pisiarisarpai – qaammammullu 400 koruunit 800 koruunillu akornanni atorlugit piniarsinnaasarluni.
Nunani allani pisiaralugit maani pisiniarineranit akikinnerupput, toqqagassallu aamma amerlanerusut taanna oqarpoq.
Taassuma tangut qillertuusami tungujortumiittoq takutippaa:
- Assersuutigalugu una cremmeq iluarilluinnagara pisiariuaannagaralu, nittartakkatigut 190 koruunip missaaniippoq. Nassiunnera ilanngutissagaanni 250 kr missaaniippoq taassumalu saniatigut qassi 30 procentiunerpoq akilissaaq tassa. Tamaanili akia pisiarineralu tikisinneralu uuma sanilliutissagaanni tamaani suli akisuallaarami taamaammat nittartakkatigut pisineq iluarinerusarpara.
![](/sites/default/files/styles/image_934x467/public/2024-04/VO%20SYNC%20Afgift%20sk%C3%B8nhedsprodukter%20Still.jpg?itok=kUxG2QBw)
38 procentillu taakku qatsulluinnarpai. Demokraatinit Nivi Olsenip aamma qatsuppai. Akitsuummi taanna 38 procentiusoq assersuutigalugu tarngummik, amermik panertitsinaveersaammik nittartakkakkut pisigaangatta akilertarparput.
Nunatsinnilu silaannaap panernera pissutigalugu amerput panertarmat Nivi Olsenip taakku nunani allani nittartakkatigut pisiarineranni akitsuutaat atorunnaarsinniarpai.
Akitsuutip peerneqarnissaanut siunnersuut Inatsisartuni ullumi siullermeerneqassaaq.
Tipigissaatinut pinnersarnermilu atortunut akitsuutit nunatta karsianut ukiumut 4 millionit koruuninik iluanaarutaasarpoq.
- Nunatsinni namminersortut pisiniarfiutillit, kiinalerisartut massage-sarfiit assingiinngitsullu annertuumik artukkerneqarnikuupput. Cremet taakkartukkatillu taakku 38 procentimik akitsuutitaqaramik. Taamaalillutik pisiniarfinnut namminersortunut annertoorujummik sunniuteqassaaq, kisianni aamma naggaterpiaani pisisartunut tassa kalaallit inuiaqatigiinni ulluinnarni atuisuusugut tamatta pitsaasumik kinguneqassaaq peerneqarpat una akitsuut, Nivi Olsen oqarpoq.
Katinnguaq Heilmannillu isumaqatigilluinnarpaa.
- Make up-iinnarneq ajorput amerlasuut, ilaasa suliffittut atorsinnaasarpaat, assersuutigalugu isiginnaartitsisartut make up-inik ilaatigut atuisinnaasarput. Ilaatigullu make up artistit attavigineqartarput ikiulaarsinnaavitigut? Soorunalimi iluaqutaassaqaaq nunatsinnut tamanna alloriaataalluassaqaaq.