Kasich Cruzilu suleqatigiillutik Trump sanngiillisinniaraat
Ted Cruzip aamma John Kasichip isumaqatigiissusiorsimallutik nalunaarutigaat.
Taasisartuminnik imminnut arsaartuukkumanatik USA-mi naalagaaffiit pingaarnerit akunnerminni agguataarniarpaat.
Taamaaliornikkut Donald Trumpip naalagaaffinni assigiinngitsuni ajugaanngitsoornissaa anguniarneqarpoq.
Isumaqatigiissutigineqartoq Twitterikkut saqqummiunneqarmat, Donald Trump ima akivoq:
- Sallutuup Tedip Kasichillu Republikanerinit qinigaanngitsoortinniarlunga isertorlutik isumaqatigiissuteqartut saqqummiunneqaqqammerpoq. Neriuutissaaruttut!, Trump allappoq, Twitterikkullu ima nangilluni:
- Sallutooq Ted aamma Kasich sianiitsorsuupput neriuutissaaleqillutillu. Aningaasaliisuisa soqutigisaqaqatigiillu immikkut ittut naammaginngilluinnarpaat. Ila ajussusia! Trump allappoq.