Karl Lyberth tukkorpoq
Soorlu Qaanaami eqqaanilu piniartut aavernik qilalukkanillu amerlassuleriikkanik piniartarunnaarlutik killeqanngitsumik piniarsinnaanngornissaat neriorsuutigalugu. Taama neriorsuinerminut pissutaatippaa, tamaani piniartut ikittuinnaammata piniagassalli amerlasoorpasuullutik.
Upernavimmiut Uummannarmiullu taakkulu eqqaanni qaleralinniat pisarisinnaasaat ullumikkornit amerlanerulissapput, tassami aqutsiveqarfiit taakku tamarmik immikkut 1000 tonsinik pisassaasa amerlineqarnissaat, Naalakkersuisunit piviusunngortitassatut siunniunneqarmat.
Qaleralittassat amerlineqarnerinnut ilutigitillugu nunami tunitsiviit amerlineqarnissaat Naalakkersuisup suliassamisut pingaartutut oqaatigaa, taamaaliornikkut unammilleqatigiinneq annerusoq ujartorlugu.
Aaalisartut aalisarsinnaanermut akuersissutaat ikilisarneqassapput, marluinnanngorlugit. Tassa qaleralinniarnermut akuersissutip saniatigut allanik aalisartunut akuersussut ataasiinnanngorlugu, taamaalilluni allaffissornikkut allatigullu pisariillisaasoqassalluni.
Nunaateqarnermik suliaqartut mininneqanngillat. Karl Lyberthip neriorsuutigaa, ataatsimiititaliarsuarmik piffissami qaninnermi pilersitsisoqassasoq, nunaateqarnermi pisariaqartinneqartut suunerinik nalunaarusiortussamik. Nalunaarusiarlu Naalakkersuisunit atuarluarneqareerpat suut pisariaqartinneqarneri naapertorlugit sulisoqalissasoq neriorsuutigalugu.