Karl Kristian: Siumut aallaqqissaagut
Karl Kristian Krusep aamma oqaatigaa pingajoqqat, tassa Jonathan Motzfeldtip, Moses Olsenip aamma Lars-Emil Johansenip partii aallartissimasaat, siulittaasussatut maannamut sassartut arlaata, partii siumut aallarteqqissinnaalluaraa.
- Inuiaqatigiinnut imminut taama nerliutigineq nukissaqassutsimik aamma ingerlatsisinnaassutsimik takutitsineruvoq. Taamaalilluni inuiaqatigiinnit takuneqarsinnaalerpoq, pingajoqqat, tassa Jonathan Motzfeldtip, Moses Olsenip aamma Lars-Emil Johansenip partiimik Siumumik pilersinerminni qimoriarsagaat piareersimammata partii siumut aallarteqqinnissaanut, Karl-Kristian Kruse oqarpoq.
Karl-Kristian Krusep aamma oqaatigaa, Naalakkersuisut siulittaasorisimasaata, Aleqa Hammondip inuiaqatigiit aningaasaataanik atornerluinerata kinguneranik, partii Siumut innarlerujussuarneqanngitsoq.
- Siulittaasorisimasatta tunuarnera Siumumi politikkikkut anguniakkatsinnut akornuseerujussuartutut uanga isiginngilara aamma Siumup politikkikkut anguniagai allanngunngillat taakkumi ingerlateqqissagatsigit. Taamaattumik naatsorsuutigaara qinersinermi ajugaanitsigut anguniakkavut ingerlateqqikkumaarlutigit.
Siammasissumik suleqatigiinneq
Inatsisartuni partiit tamarmik suleqatigiinnissaat siunissami anguniagaasoq Karl-Kristian Krusep aamma oqaatigaa.
- Tassa maanna alloriarnerup tulleraa, Nunarput inuilu pillugit annertunerusumik suleqatigiittariaqarneq tamannalu pillugu partiit akornanni oqaloqatigiissinnaassuseqarneq aallartittariaqarpoq, tassa tamanna qinersinermi tullermi angorusutarput, Siumup siulittaasorigallagaata tullia, Karl-Kristian Kruse naggasiivoq.
Siumut immikkut ittumik ataatsimeersuarpat, oktobarip 18-anni Nuummi pisussami, siulittaasussatut piukkullutik sassartut maannamut marluinnaapput tassaallutik, Kim Kielsen aamma Doris Jakobsen