Kanunupe siulittaasortaarpoq

Kalaallit Nunaanni Naatsorsueqqissaartarfiup kisitsisaatai naapertorlugit Kalaallit Nunaanni innuttaasut 56.653-sut taakkunannga 7.019-nit nunaqarfinni najugaqarput.

Taanna siulittaasutut qinerneqarpoq oqarasuaatikkut ataatsimeersuartoqarnerani.

Ove Villadsen oqaluttuarpoq KANUNUPE-mi siulersuisunngortut suli katersuussimanngitsut, tamannalu pissasoq qaammatip qiteqqunnerani. Taamaattumillu peqatigiiffimmi suliassat suli pingaarnersiorneqarsimanngitsut.

Eqqagassat 

Nunaqarfimmi aqutsisut peqatigiiffianni KANUNUPE-mi suliassaaleqinavianngillat.

- Pinngaartillugit eqqaasimavakka, eqqaaveqarnikkut anartarfinnillu eqqaasarnikkut tunngasut, Kanunupemi siulittaasunngorlaaq Ove Villadsen taama oqarpoq.

Avannaata Kommuniani, Ove Villadsenip aamma najugaqarfigisaani eqqagassarpassuit ajornartorsiutaanerat pillugu KNR-imi oqaluttuarineqartarpoq,

Kingullermik Kullorsuarmi eqqagassat ajornartorsiutaanerujussuat oqaluttuarineqarpoq.

- Oqaasissaaleqinarporluunniit. Tupinnarpoq takullugu nunaqarfik taama eqqagassaqartigisinnaammat tipeqarujussuarlunilu, Birgitte Møldrup, Upernaviup nunaqarfiisa avannarlersaanni Kullorsuami sulinerminut atatillugu angalareerluni KNR-imut taama oqarpoq.

Avaannaata kommuniani nunaqarfimmini tamani eqqaavilerinermi ajornartorsiutaasut aaqqiissuteqarfiginiarunik 135 million koruuninik akeqassaaq.

Nunaqarfinni innuttaasut atugaat pitsanngorsaavigineqarneqassappata eqqaaveqarneq kisimi ajornartorsiutigineqanngilaq:

- Ilaqutariinnut inissiat, illut nammineq sananeqarsinnaasut taakkua nunaqarfinni massakkut ajornartorsiutaapput annertuumik taakkualu pingaarnertut sulissutigissallugit toqqarnikuuakka, Ove Villadsen oqarpoq.

Nammineerluni illuliat, illuliassat katiteriaannaat, pisortanit tapiffigineqarlutik nunaqarfippassuarnut nassiunneqartartut.

Nammineerlutik illulianik piginnittussat illuliap atortussai akilertarpaat illulu nammineq sanasarlugu.

Jens Kristian Therkelsen nunaqarfiit peqatigiiffianni Kanunupemi ukiuni 13-ni siulittaasuuvoq.

KANUNUPE, nunatsinni nunaqarfiit 54-usut nunaqarfinnut aqutsuisuisa peqatigiiffigaat.