KANUKOKA siunnersuummut isumaqataanngilaq
Kommunit isumaginninnikkut suliaat pillugit nakkutigineqarnerulernissaannik, inatsisillu naapertorlugit suliarineqanngitsutut nalilerneqarpata Namminersorlutik Oqartussat suliamik tigusisinnaanissaannik isumaginninnermut naalakkersuisoq Martha Lund Olsen siunnersuuteqarniarpoq.
Tamanna Kommuneqarfik Sermersuumi borgmesterimit, Asii Chemnitz Narupimit isornartoqartinneqarpoq, ilaatigut kommunit nammineersinnaassusaannut saassussinertut taaneqarluni.
Suleqatigiinnerunissamik ujartuisoq
Aamma kommunit kattuffiannit taama isumaqarput. Kommunit meeqqanik sullissinissaminnut ajornartorsiuteqarpata, suleqatigiinnikkut aaqqiivigineqartariaqartoq, KANUKOKA-mi siulittaasoq, Palle Jerimiassen oqarpoq.
- KANUKOKA-p tungaaninngaannit isumaqarpugut suliassami taama pingaaruteqartigisumi, kivitseqatigiinneq sulisutigullu aamma kivitseqatigiilluni suliamik aaqqiiniarneq tamarmiulluta ataatsimoorullugu suleqatigiissutigisariaqaripput, Palle Jerimiassen oqarpoq.
Taassuma aamma eqqaasitsissutigaa, kommunit isumaginninnermut suliaat Namminersorlutik Oqartussallu periusilioreersut.
- Isumaqatigiissutiginikuuarput siunnersuisarfimmik kommuninut ikiuisartussamik Namminersorlutik Oqartussat pilersitsissasut. Taannalu aatsaat aallartissimatsiaannarpoq, aammalu taanna atorluarlugu annertusarlugulu suliassaq kivittariaqarparput, Meeqqat Illersuisuata siorna nalunaarusiaa tunngavigineqartoq, Martha Lund Olsen siornatigut nassuiaavoq.
Aamma atuaruk Periuseq nutaaq meeqqanut inuusuttunullu iluaqutaasoq
Meeqqat sumiginnagaasut
Kommunillu isumaginninnermut suliatik naammassisinnaanngippatigit, meeqqat atugarissaarnerulersinniarlugit Namminersorlutik Oqartussat suliamik tigusisinnaassasut siunnersuutigineqarpoq.
Aamma atuaruk Naalakkersuisut kommunit nakkutiginerulerniarpaat
Aamma atuaruk Meeqqat Illersuisuat: Meeqqat pisinnaatitaaffii unioqqutinneqarput
Siunnersuulli Kommuneqarfik Sermersuumi borgmesterip, Asii Chemnitz Narupip sakkortuumik isornartorsiorpaa.
- Siunnersuut naapertorlugu kommunimi nammineersinnaassuseq innarlerneqassaaq, peqataanillu kommunimi missingersuusiorniarneq ajornarsitissallugu. Politikeritut akisussaasutut isumaginninnermut suliassaqarfiup taama annertutigisup aqussinnaannginnera akuersaarsinnaanngilarput. Inatsisissatut siunnersuuteqarnermi Martha Lund Olsenip suliassaqarfimmik tigusinissaminut siunniussaqarpoq uagullu qanoq iliuuseqarfigisinnaanngisatsinnik kommunimi missingersuutinik qanorluunniit atuisinnaalluni, Asii Chemnitz Narup tusagassiuutinut nalunaarummi oqarpoq.
Suliassat annertuut
Isumaginninnerulli iluani kommunit artorsartut, Palle Jerimiassenip nassuerutigaa, tamannalu pitsanngorsarneqartariaqartoq oqarluni.
Periuserineqarniartumulli isumaqataanngilaq.
- Uani Martha isumaqatigilluinnarpara. Meeqqat tungaatigut suliassaqarpugut annertuunik. Taannalu suleqatigiinnikkut kivinniartussaavarput. Kisianni periuserineqarniartoq, inatsisissami tunngavigineqarniartoq, kommuninut akisussaaffimmik arsaarinnissinnaaneq isumaqatiginngilluinnarparput, KANUKOKA-mi siulittaasoq Palle Jerimiassen oqarpoq.
