KANUKOKA-p siunissaa siulittaasuusimasumit aalajangerneqarsinnaasoq
- Avannaani kommuninngortussanit maannamut oqariartuutigineqartut ersarittorujussuupput. Taamaammat uanga naatsorsuutigivara, 2018 tassaassasoq, aalajangersakkat malillugit, KANUKOKA-mik matusiartuaarneq allaqqunneqarsinnaanavianngitsoq, Simon Simonsen, oqarpoq.
Kommunissat marluk ilaasortaassanngippata, kattuffiup atuutiinnarnissaa imminut akilersinnaanavianngitsoq ukiaq isumasioqatigiinnermi inerniliunneqartoq, taanna nassuiaavoq.
Kommune Qeqertalimmilu borgmesterissaq, Ane Hansen, sisamanngormat ima oqarpoq.
- Apeqqusertorujussuuara ilaasortaaneq qanoq iluaqutaatigissanersoq, Ane Hansen oqarpoq.
Avannaata Kommunianit kattuffimmut ilaasortaanissamut suli isummernatik, borgmesterissaq Palle Jerimiassen, KNR-imut sisamanngormat oqarpoq. Periarfissalli tamarmik ammasut siusinnerusukkut oqaatigereerpaa.
AAMMA ATUARUK Ane Hansen afviser KANUKOKA
Kommuneqarfik Sermersuup ilaasortaajunnaarnera
Kommuneqarfik Sermersooq KANUKOKA-mit politikkikkut 2014-imi assortuuterujussuartoqareernerani ilaasortaajunnaarmalli kattuffiup sunniuteqarsinnaanera milliartuaarpoq. Kattuffiup allattoqarfia Maniitsumut nuunneqarpoq, sulisulli ataasiinnarluunniit nooqataarusunngilaq.
Maniitsumut nuunnissaq sioqqullugu taamani siulittaasuusoq, Palle Jerimiassen, atuuffimmininngaanniit tunuarpoq, tassungalu atatillugu kattuffiup atuukkunnaarnissaa siunnersuutigalugu.
AAMMA ATUARUK Kommuneqarfik Sermersooq melder sig ud af Kanukoka
Kommunit aqunneqarnerat pillugu inatsit nutaaq, KANUKOKA-mik taasaqanngitsoq, Inatsisartut ukiakkut ataatsimiinnerminni akuersissutigaat.
Siunissaq ukiutoqannginnerani aalajangerneqarsinnaasoq
KANUKOKA-p siunissaa aappaagu februaarimi aalajangerneqarumaartoq, Simon Simonsenip siusinnerusukkut oqaatigaa.
Aalajangiinissarli ukiutoqqannginneranut siuartinneqarsinnaasoq, siulittaasup maanna oqaatigaa.
- Uani maannakkut eqqarsaatigineqarpoq, immikkut ittumik ataatsimeersuartoqarsinnaaneq. Taanna misissuiffigineqarpoq, aammalu siunniunneqartussaassagunarpoq, KANUKOKA-p siulittaasua, Simon Simonsen, oqarpoq.
