KANUKOKA-p isornartorsiuineq taperserpaa

SIK-p GA-llu Ove Karl Berthelsen isornartorsiorpaat, oqarlutik taassuma Kalaallit Nunaat avissartinniaraa ataatsimoortitsinani.

Sulisartut Kattuffiata sulisitsisullu peqatigiiffiata, siunnersuutigaat isumaqatigiinniarnermi attuumassuteqartut peqatigalugit, suliffeqarfissuarmut piumasaqaasiortoqassasoq. Naalakkersuisulli siunnersuutigaat, saviminissarsiornermut attuumassuteqartut ataasiakkaallugit London Miningimit qaaqquneqasssasut, attuumassuteqartullu piumasaqaataannik tusarniarlugit. Taamaaliornikkut London Mining annertuvallaamik oqartussaaffeqalernissaa namminnerlu piumasaat SIK-mit GA-millu annilaanngatigineqalerluni.

London Miningip piumasaqaatinik piviusunngortitsinissaa pillugu, IBA-mik isumaqatigiinniarnerni, kommunit Namminersorlutillu Oqartussat piumasaqaasiortussaapput, ilaatigut isumaqatigiinniutigineqassalluni Isukasiani saviminissarsiorneq aallartinneqarpat nunaqavissut qassit sulisorineqassanersut.

Tassalu tamakku London Miningip namminneerlutik aalajangiiffigissagaat, SIK-mit GA-mit KANUKOKA-millu annilaanngatigineqartoq.

- London Mining-ip attuumassuteqartut ataasiakkaarlugit ataatsimeeqatigereerlugit isumaqatigiissutissamik missiliuusiorpat, taava takorloorneqarsinnaavoq, IBA-mik isumaqatigiinniarnerit, 'piumasanik sakkukinnerpaaginnarnik' isumaqatigiinniuteqarfigineqalerenissaat. Taamassappallu isumaqatigiinniarnerit Kalaallit Nunaannut assoroornartuaannarnissaat aarleqqutigisariaqalissaaq, KANUKOKA-p siulittaasua, Martha Abelsen tusagssiutinut nalunaarummi allappoq.

Isumaqatigiinniarnerilli aallartinneranni saviminissarsiornissamut, Nunatsinnit attuumassuteqartut tusarnaarneqarumaartut, Naalakkersuisut siulittaasuata, Kuupik V. Kleistip oqatigaa.

- Misilittakkavut tunngavigalugit taamaattussaavoq, siornaakkunni isumaqatigiinniarnerit eqqarsaatigalugit tamanna misilittagaqarfigaarput pissarsiaqaatigalutigulu aamma massakkut naatsorsuutigaara taamannak angusaqassalluta. Periutsilli qanoq ittut atorneqassanersut SIK , GA aamma kommunit naapinneqarneranni eqqartorneqassapput. Maannali oqaatigiinnarsinnaavara isumaqatigiinniarnerit qanoq ingerlanneqassanersut, tassami tusagassiorfiit aqqutigalugit isumaqatigiinniarnerit ingerlassinnaanngilagut, taama Naalakkersuisut siulitaasuat, Kuupik V. Kleist  oqarpoq.

IBA pillugu isumaqatigiinniarnermi Nunatsinnit soqutiginnittut aamma London Mining qaaqquneqarumaartut, Atsitassanut Oqartussaqarfimmit allakkani ilaatigut allassimavoq.

Taakku ataatsimeeqatiginissaat Nuumi pissaaq novembarillu qiteqqunnerata missaani pissasoq takorloorneqarluni.