KANUKOKA-p ingerlaqqissinnaanissaa takorloorumaatsinneqarpoq

-  KANUKOKA-p ingerlaqqissinnaanera uanga takorloorsinnaanngilara, Palle Jeremiassen, Avannaata Kommuniani borgmsterinngortussaq taama oqarpoq.

Avannaata Kommunia Kommune Qeqertalillu Qaasuitsup Kommuniata KANUKOKA-mi ilaasortaanera 2018-imi komuunninngorunik kingornuttussaavaat.

Palle Jerimiassen KANUKOKA-mi sioratigut siulittaasuunikuuvoq, siulittaasutullu siorna juunimi tunuarpoq, kommunillu kattuffiata matuneqarnissaa innersuussutigalugu. KANUKOKA-llu 2019 aallarnerfigalugu matunissaa naatsorsuutigaa:

- KANUKOKA-p taamatut isikkoqartilluni siunissami massakkut ingerlaqqinnissaa naatsorsuutiginngilara, taammaattumik naatsorsuutigivara ukioq 2018-ip ingerlalaarnerani KANUKOKA atorunnaarsimassasoq, Palle Jeremiassen oqarpoq.

Kommunit januaarip aallaqqaataani tallimaalersussat ikioqatigiilluarnissaat ilisimasaminnillu avitseqatigiissinnaannissaat peqqutigalugu, nutaamik suleqatigiiffiliortoqartariaqartoq, Avannaata Kommuniani borgmesterinngortussamit oqaatigineqarpoq.
Borgmesterinngortussamimmi maluginiarneqarmat KANUKOKA taaneqaannartoq kommunit ilai suleqataajunnaartarmata.

AAMMA ATUARUK Ane Hansen afviser KANUKOKA

Kommunit ataatsimoorfigisinnaasassaannik pilersitsisoqartariaqarsoraa

- KANUKOKA-lu taaneqartoq Sermersooq oqaloqataajumajunnaartarpoq, aamma massakkut malunnarsereerpoq Qeqertalik aamma taama inissisimasoq taava kommunit pingasuinnaat kattuffeqarnissaat orniginartinngilara. Orniginartinnerpaavara Kommuni tamakkerlutik issiallutik kommuni tamakkerlutik oqaloqatigiittarfigisinnaassaannik ataatsimoorfigisinnaasaannik pilersitsinissaq taanna angorusuppara.

KANUKOKA-mi Siulersuisuni ilaasortat decembarip ulluisa 18-ianni kattuffiup siunissaa pillugu aalajangiisussaapput. KANUKOKA-mi siulersuisuni siulittaasup Simon Simonsenip oqaatigereernikuuaa KANUKOKA-p 2018 aallarnerfigalugu matujartuaarnissaa naatsorsuutigalugu. KANUKOKA-p siulittaasua kattuffik matuissanersoq aperineqarami, ima akivoq.

- Tassa allaqqunneqarsinnaagunanngilaq, aamma siulersuisut kingullermik ataatsimiinnerminni taanna oqaatigikannerpaat taamaammat pissanganassaaq periarfissaq qanoq annertugisoq sukkatigisorlu atorlugu matusiartuaarnissaq ingerlanneqassanersoq.

AAMMA ATUARUK KANUKOKA-p siunissaa siulittaasuusimasumit aalajangerneqarsinnaasoq

AAMMA ATUARUK KANUKOKA bakker Malik Berthelsen op