KANUKOKA-mi pisortaq soraarninngulerpoq
Martha Labansenip KANUKOKA-mi pisortatut sulinerminni, pisortat suliffiisa iluanni suliassanik unamminartunik ingerlatsisarsimavoq.
Ilaatigut Aaqqissuussaanermut ataatsimiititaliaq siulittaasuuffigisimavaa. Ataatsimiititaliap isumaliuutissiissutaa tunngavigalugu kommunit 2009-mi kattupput. Isumaqarporlu angusaq ajunngilluinnartoq.
-Isumaliuutissiissummi suliaqaratta taamanikkut takorluugaqarnikuuvugut kommunit angininngorpata, taava innuttaasunut sullissineq pitsaanerusoq, illoqarfiit nunaqarfiit mikinerusunut anngunneqarsinnaalissasoq. Taannalu tunngaviusumik eqqarsaat isumaqarpunga qanillisimagipput. Taamanikkummi kommunit 18-iugallarmata, kommunit annikitsut innuttakitsut periarfissaat annikitsuunikuupput, Martha Labansen oqarpoq.
Martha Labansen Kalaallit Nunaani Kommunit Kattuffianni ukiuni 15-inini sulivoq, siullermik isumaginninnermik tunngasunut siunnersortitut, ukioq ataaseq missaani tassani sulereerluni KANUKOKA-mi pisortatut 1999-imi sulilerpoq.
Kommunit kattuffiat septembarip aallaqqaataanit pisortassarsiortariaqassapput, Martha Labansen soraarninngussammat.
-Uanga sulininni uinnit assut ilalersorneqarnikuuvunga aamma taanna nuannaarutigisorujussuuara. Massakkut utertitsilaartariaqarpunga aammalu nammineerlunga soqutigisannik sammisaqalersinnaallunga neriuutigivara, Martha Labansen oqarpoq.
Martha Labansen 63-inik maanna ukiulik soraarninngulerpoq, isumaqarporlu arnat suliffikkaat ikileriassasut, ernumassutiginngilaali.
-36-inik ukioqarlunga Namminersorlutik Oqartussani direktørinngoqaarpunga. Taamanikkullu inissisimanera naleqqiullugu, isumaqarpunga neriulluarfiusoq arnat eqqarsaatigalugit. Amerlanerujussuanngornikuuppummi taamatut qaffasinnerusumik atorfillit, Martha Labansen oqarpoq.
KANUKOKA-mi ukiuni amerlasuuni sunniuteqareerluni saniatigut aamma pisortat suliassaqarfiisa aaqqissuuneqarnerannut tunngatillugu suliassanik annertuunik ingerlatseqataasimavoq. Ilaatigut taamanikkut Namminersornerullutik Oqartussani pisortaasimavoq aammalu Nuup Kommuuniani inunnik isumaginninnermi sulisimalluni.
Martha Labansenip suliassat annertuut nutaat ingerlateqqilerpai; ilaatigut missingersuusiortarnikkut suleqatigiinnissamik isumaqatigiissutissaq Namminersorlutik Oqartussat kommunillu akornanni aningaasaqarnikkut aaqqissuussinernut tunngaviusussaq politikkikkut aalajangiiffigineqarnissaminut piareerpoq. Taamatuttaarlu pisortat ataatsimoorussamik qarasaasiaqarnikkut ingerlatsinikkullu aaqqissuussiniissaannut ERP-mut tunngatillugu aalajangiinissamut tunngavissaq piareerluni.
