KANUKOKA juulip 31-ani atorunnaartussanngortoq

Kattuffiup atuukkunnaarsinneqarnissaanut suliniutit qaammatini tulliuttuni arfineq-marlunni suliarineqassapput, kattuffillu ukiuni 46-ni sulereersoq taamanikkussamut atuukkunnaassalluni.

Kattuffiup atorunnaarsinneqarnissaanut ataatsimiititaliaq aallartitat Juullip ukiortaallu akornanni ataatsimiinneranni pilersinneqarpoq, suliaallu tassa aallartereerluni.

KANUKOKA-p Maniitsumi allattoqarfia sisamanik maanna sulisoqarpoq, kattuffillu atorunnaarsinneqarpat nutaamik taakku allamik suliffissarsiortariaqassallutik.

KANUKOKA-lli siulittaasuata Simon Simonsenip neriuutigaa maanna sulisorineqartut kattuffiup juulip ulluisa 31-anni atorunnaarsinneqarnissaata tungaanut sulisoriinnassallugit.

Kommunit arlallit kommunit kattuffiannut ilaasortaarusunnginnertik nalunaarutiginikuummassuk kattuffiup ingerlaannarnissaanut tunngavissaqanngitsoq, Simon Simonsenip nassuerutigaa.

Kattuffilli pillugu partiit ataasiakkaat politikkiat aallaavigalugu isummersortoqartoq aamma oqaatigaa, Asii Chemnitz Narupip Ane Hansenillu pingaarnertut isornartorsiuisimanerat matumani pineqarluni.

- Siunissami suleqatigiinnissaq politikkikkut isiginiagassanit, najukkani inuiaqatigiit assigiinngissutaannik pisariaqartitaannillu aallaaveqanngitsunit, aqunneqassappat tamanna kommunit siunissaannut ernumanartorujussuuvoq, Simon Simonsen Sermitsiaq.AG.-mut oqarpoq.