Kangilinnguit takornariarfittut ineriartortinneqarlik

Issittumi sakkutooqarfiusimasup Kangilinnguit eqqaatalu qanoq atorneqarsinnaaneranik siunnersuutinik arlalinnik illussanik titartaasartoq Peter Barfoed aamma uumassusilerisoq Andreas Brogard Buhl saqqummiussaqarput. Aviisi Politiken qanittukkut taama allaaserisaqarpoq.

Allattoq Inge S. Rasmussen

juulip 01-at 2015 09:39

Nutserisoq Jaaku Lyberth

Sakkutooqarfik Kangilinnguaniittoq 2012-imi Nuummut nuunneqarmat, Kangilinnguit atorneqarunnaarput.
Peter Barfoedip aamma Andreas Brogaard Buhlip Kangilinnguit takornariarfittut qanoq ineriartortinneqarsinnaagaluartoq saqqummiuppaat iliuuseqartoqanngineralu isornartorsiorpaat.

Aamma atuaruk Schweizimiut Kangilinnguani nunalerinermik ilinniarfiliulersaartut

Kangilinnguit eqqaanni, qaqqasiortoqarsinnaavoq, aalisartoqarsinnaavoq, umimmanniartoqarsinaallunilu, aamma umiarsuit takornarianik angallassisartut tikissinnaapput, taamatullu Arsuup kangerluata imartaani sammisaqartitsisoqarsinnaasoq, Peter Barfoed amma Andreas Brogaard Buhl isumaqarput.
Ukiup ingerlanerani piffissap sivisunersaani sisorarfiusinnaasumik pilersitsisoqarsinnaavoq majuartaatit pioreersut annertusineqarpata.
Sakkutooqarfiusimasoq Kangilinnguaniittoq Danmarkimi naalagaaffiup pigisaraa taanna 2013-imi tuniniarneqaraluarpoq iluatsinngitsumilli.

Aamma atuaruk Sara Olsvig: Kangilinnguit salinneqarli

Kangilinnguit mingutsinneqarsimanerat tamatumunga pissutaasorineqarpoq. Tamanna illersornissamut qullersaqarfiup isumagisariaqaraluarpaa, Peter Barfoed aamma Andreas Brogaard Buhl isumaqarput.

Tamannami Kangilinnguit ineriatortinneqarnissaannut aningaasaleerusuttunut soqutiginnilersitsisinnaammat.
Kangilinnguit ineriartortinneqarnerisigut Kujataani takornariaqarnerup annertusineqarnissaannut periarfissatsialaasoq siunnersuuteqartut isumaqarput, Narsarsuarmi timmisartunut mittarfik imaluunnit Qaqortumi timmisartunut mittarfissaq iluaqutigalugit.